Элчихона Исроилда ҳалок бўлган шахс юзасидан расмий маълумот берди

Сўнгги кунларда айрим оммавий ахборот воситалари ва ижтимоий тармоқларда Исроилдаги ракета ҳужуми оқибатида ҳалок бўлган шахс ҳақида турли хабарлар тарқалмоқда. Ўзбекистоннинг Исроилдаги элчихонаси мазкур ҳолат юзасидан расмий маълумот берди.

Фото: Синьхуа

Маълум қилинишича, 2026 йил 9 март куни Исроилнинг Йехуд шаҳрида қурилиш майдонида содир бўлган ракета ҳужуми оқибатида ҳалок бўлган 62 ёшли Рустам Ғуломов Ўзбекистонда туғилиб вояга етган. Бироқ у 2017 йилда Ўзбекистон фуқаролигидан чиққан бўлиб, сўнгги 14 йил давомида Исроилда яшаб келган ва ушбу давлат фуқаролигини олган.

Шу муносабат билан Ўзбекистоннинг Исроилдаги элчихонаси марҳумнинг оила аъзолари ва яқинларига чуқур ҳамдардлик билдирган.

Шунингдек, 11 март ҳолатига кўра, Исроил ҳудудида Ўзбекистон фуқаролари жароҳат олгани ҳақида элчихонага ҳеч қандай хабар келиб тушмагани маълум қилинди.

Айни пайтда Исроилда вазият кескинлигича сақланиб қолаётгани таъкидланиб, ушбу мамлакатда вақтинча меҳнат фаолиятини олиб бораётган ёки доимий яшаб келаётган барча ватандошлар хавфсизлик талаб ва қоидаларига қатъий риоя қилишга чақирилди.

Тайёрлаган Отабек Матназаров

#Эрон #Исроил

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.