Франция Алексей ва Мария Москалёвларга ҳимоя тақдим этди

Франция Россия фуқароси Алексей Москалёв ва унинг қизи Марияга ҳуманитар ҳимоя тақдим этди. Улар урушга қарши позицияси сабаб таъқибларга учрагандан кейин мамлакатни тарк этган эди. Бу ҳақда 11 март, чоршанба куни кечқурун “Новая газета Европа” хабар қилди.

Нашр ота ва қиз Москалёвларнинг, эҳтимол, Париж аэропортида туширилган суратини эълон қилди. Журналистлар маълумотига кўра, бир кун олдин Франция Москалёвларга ҳуманитар визалар ва хорижга чиқиш паспортисиз мамлакатга кириш имконини берувчи ҳужжатни расмийлаштириб берган.

Газета ёзишича, бу борадаги тегишли сўров аввалроқ Франция Ташқи ишлар вазирлигига inTransit ҳуқуқни ҳимоя қилиш ташкилоти томонидан юборилган. Бундан олдин Москалёвлар Германиядан ҳуманитар виза олишга уринган, аммо “ҳужжатларни расмийлаштириш жараёни бир йилдан ортиққа чўзилган”. Германияда россияликлар ва беларусларга ҳуманитар визалар бериш амалда тўхтатилган.

Москалёвлар иши яна шу билан мураккаблашган эдики, уларда биометрик паспортлар йўқ эди, 2026 йил 1 январдан эса Россиянинг беш йиллик паспортлари Европа Иттифоқининг қатор мамлакатларида тан олинмай қўйган. Бироқ феврал ойида Франция Ташқи ишлар вазирлиги ота ва қизнинг ҳуманитар ҳимоя сўровини маъқуллаган.

Алексей ва Мария Москалёвларнинг Россияда таъқиб қилиниши 2022 йил апрелида, Россиянинг Украинага кенг кўламли бостириб кириши бошланганидан кўп ўтмай бошланган. Тула вилоятидаги мактабда 13 ёшли қизга тасвирий санъат дарсида Россия қўшинларини қўллаб-қувватловчи расм чизиш топшириғи берилган. Аммо Маша бунинг ўрнига болани ракеталардан тўсиб турган аёлни, шунингдек, Россия ва Украина байроқларини тасвирлаган; биринчисига “Урушга йўқ”, иккинчисига эса “Украинага шон-шараф” деб ёзган.

Мактаб директори полицияни чақирган, қиз ва унинг отасига таҳдид қила бошлашган, Маша олдига эса мактабга ФХХ ходимлари “суҳбатлашиш” учун келган. Алексейга нисбатан унинг ижтимоий тармоқлардаги урушга қарши изоҳларига таяниб, Россия қуролли кучларини “обрўсизлантириш” ҳақидаги модда бўйича маъмурий баённома тузилган. Кейинроқ унга армияни такроран “обрўсизлантириш” ҳақида жиноят иши қўзғатилган ва икки йилга колонияга ҳукм қилинган. Қиз эса бу вақтда бошпанага жойлаштирилган, сўнгра урушни қўллаб-қувватлаган онаси васийлигига топширилган.

Маша бутун суд жараёни давомида ва отаси колонияда бўлган пайтда уни очиқча қўллаб-қувватлаб келган. Алексей озодликка чиққанидан кейин, 2024 йил октябрида у қизи билан бирга Россияни тарк этган.

“Мемориал” ҳуқуқни ҳимоя қилиш лойиҳаси Алексей Москалёвни сиёсий маҳбус деб эътироф этган, суд қарори эса ҳатто Россиянинг Украинага босқинида қатнашган “Вагнер” хусусий ҳарбий компаниясида ҳам танқид қилинган. Москалёвлар таъқиби Россиядан ташқарида ҳам кенг муҳокама қилинган — бу ҳақда Албаниянинг БМТдаги доимий вакили ташкилот Хавфсизлик кенгашининг Россиянинг Украинага қарши урушига бағишланган йиғилишларидан бирида ҳам гапирган.