Германияда 16 ёшли украиналик иккита қотиллик учун 10 йилга қамалди

Эссендаги суд 16 ёшли Украина фуқаросини 10 йиллик қамоқ жазосига ҳукм қилди. У ўтган ёзда Дорстен шаҳри яқинидаги ўрмонда 32 ёшли украин қочқини ва унинг бир ярим ёшли қизини шафқатсизларча ўлдирганини ўзи тан олган эди.

Фото: Bludau/FotoBludau/dpa

Германиянинг Эссен шаҳридаги ер суди 16 ёшли Украина фуқаросини қўшни аёл ва унинг қизини ўлдиргани учун 10 йиллик қамоқ жазосига ҳукм қилди. Шимолий Рейн — Вестфалия еридаги Дорстен шаҳрида яшовчи ўсмир икки модда бўйича одам ўлдиришда айбдор деб топилди, деб хабар қилди 9 март, душанба куни dpa агентлиги. Судланувчининг ёши сабабли суд жараёни ёпиқ тартибда ўтказилди.

2025 йил 29 июн куни Дорстен яқинидаги ўрмон йўлагида Украинадан келган 32 ёшли қочқин аёл ва унинг бир ярим ёшли қизчасининг жасадлари топилган. Ҳар иккиси ҳам, тахминларга кўра, оғир бош жароҳатлари етказилгани оқибатида вафот этган. Шу куни кечқурун қурбонлар билан бир хил қочқинлар бошпанасида яшаган 16 ёшли йигитнинг ўзи полицияга бориб, уларни ўлдирганини тан олган.

Аниқланишича, жиноят содир этилишидан олдин маҳкум этилган ўсмир билан аёл ўртасида жинсий алоқа бўлган. Шундан кейин йигитни қотилликка ундаган сабаб номаълумлигича қолмоқда. У жазони вояга етмаганлар учун мўлжалланган қамоқ муассасасида ўтайди. Ҳукм ҳозирча қонуний кучга киргани йўқ.

2024 йил 2 декабрда худди шу Эссен суди Оберхаузен шаҳрида ёш украиналик баскетболчиларни ўлдиргани учун тўрт нафар ўсмирга ҳукм чиқарган эди. Икки нафар Сурия фуқароси, бир нафар Германия фуқароси, шунингдек Германия ва Греция фуқаролигига эга яна бир шахс 8,5 йилдан 10 йилгача озодликдан маҳрум этиш жазосига ҳукм қилинган. Жиноят содир этилган пайтда айбланувчилар 14 ёшдан 16 ёшгача бўлгани учун бу иш ҳам ёпиқ тартибда кўрилган ва унинг кўплаб тафсилотлари ошкор этилмаган.

Жумладан, қурбонлар билан жиноятчилар ўртасидаги можаро сабаби номаълумлигича қолган. Дастлаб айблов томони спортчиларга ҳужум уларнинг Украинадан келгани учун содир этилган, деб ҳисоблаган эди. Бироқ суд қарорига кўра, бу мотив тасдиғини топмаган.

Маҳкумлардан бири пичоқ билан ҳужум қилганини тан олган, қолганлари эса зарба берганини билдирган. Аввалроқ уларнинг уч нафари бир неча бор жиноят содир этган эди — хусусан, иш фигурантларидан бири олдинроқ талончилик ва тан жароҳати етказиш бўйича ушланган бўлган.