Кубада миллий миқёсдаги блэкаут юз берди

Кубада электр энергияси тўлиқ ўчиб қолди, деб хабар қилди давлат электр тармоқлари оператори UNE 16 март, душанба куни. Шу тариқа оролнинг барча аҳолиси — тахминан 10 миллион киши электр таъминотисиз қолган.

«Ҳозирги вақтда электр таъминотини тиклаш чоралари кўрилмоқда», — дейилади UNE компаниясининг X микроблогида. Шу билан бирга, Reuters агентлиги эслатишича, Кубадаги ҳозирги блэкаутдан олдин ҳам электр энергияси ўчишининг бутун бошли қатор ҳолатлари кузатилган. Айрим ҳолатларда кубаликлар бир неча сутка давомида электр таъминотисиз қолган.

Шу вазият фонида 14 ва 15 март кунлари, яъни дам олиш кунларида, мамлакатда норозилик намойишлари бўлиб ўтди, улар айрим жойларда кўча тартибсизликларига айланди. Масалан, 14 мартга ўтар кечаси намойишчилар гуруҳи Морон шаҳридаги ҳукмрон Коммунистик партия қароргоҳига ҳужум қилди.

Кубадаги иқтисодий ва энергетика инқирози АҚШ томонидан қўлланган нефт блокадаси сабабли анча кучайди. Оролнинг энергия таъминоти асосан эскирган нефт электр станциялари ҳисобидан амалга оширилади. Яқин вақтгача Кубага нефт етказиб берувчи асосий давлат Венесуэла эди. Бироқ жорий йил январ ойида АҚШнинг ушбу мамлакатга ҳужум қилиши ва унинг раҳбари Николас Мадурони қўлга олиши ортидан Каракас кубаликларга нефт етказиб беришни тўхтатди.

Бундан ташқари, Reuters агентлиги эслатишича, Вашингтон Кубага нефт сотадиган давлатларга нисбатан оширилган божлар жорий этиш билан таҳдид қилган. АҚШ президенти Дональд Трамп ҳам Куба Эрон билан уруш ва Николас Мадурони ағдаришдан кейин унинг кун тартибидаги навбатдаги масала бўлишини айтган.

Куба президенти Мигел Диас-Канел феврал бошида АҚШ блокадасини «жиноий ва геноцид содир этишга қаратилган» деб қоралаган эди. Аммо 13 март куни у кучайиб бораётган энергетика инқирози шароитида АҚШ билан музокаралар бошланганини маълум қилди ва шу билан бу алоқаларни биринчи марта расман тан олди.

The New York Times газетаси 16 апрел куни хабар беришича, Доналд Трамп ўша куни журналистлар билан мулоқот чоғида «Кубани қўлга киритиш шарафи» унга насиб этиши мумкин, деган фикрни билдирган.

«Кубани қўлга киритиш. Яъни, уни озод қилиш, эгаллашни назарда тутяпман. Ўйлашимча, у билан хоҳлаган ишимни қила оламан. Ҳозир бу жуда заифлашган мамлакат», — дея нашр Оқ уй раҳбарининг сўзларини келтиради.

16 март куни эрталаб эълон қилинган NBC News телеканалига берган интервюсида Куба бош вазирининг ўринбосари Оскар Перес-Олива «Куба АҚШ компаниялари, шунингдек АҚШда яшовчи кубаликлар ва уларнинг авлодлари билан мослашувчан савдо муносабатларига тайёр», деб таъкидлаган.