Трамп: Яқин Шарққа қўшин юборишни режалаштирмаяпман

АҚШ Эронга қарши АҚШ ва Исроил уруши сабабли Яқин Шарққа қўшимча ҳарбий контингент юбормайди. Бу ҳақда мамлакат президенти Доналд Трамп 19 март, пайшанба куни Япония бош вазири Санаэ Такаичининг Вашингтондаги Оқ уйга ташрифи чоғида матбуот билан мулоқотда маълум қилди. “Мен ҳеч қаерга қўшин юбормаяпман”, — деди Трамп журналистнинг тегишли саволига жавобан.

“Агар шундай қилаётган бўлганимда ҳам, бу ҳақда сизларга аниқ айтмаган бўлардим. Лекин мен қўшин юбормаяпман. Биз вазиятни назорат остида ушлаб туриш учун зарур бўлган барча ишни қиламиз”, — дея давом эттирди Оқ уй раҳбари.

Шу куннинг ўзида Reuters агентлиги манбаларига таяниб хабар беришича, Доналд Трамп маъмурияти Эронга қарши ҳарбий операцияни кенгайтириб, Яқин Шарққа яна бир неча минг ҳарбий хизматчини кўчириши мумкин. Унинг маълумотига кўра, Вашингтонда урушни давом эттиришнинг турли сценарийлари кўриб чиқилмоқда, жумладан қуруқликдаги операцияни бошлаш, шунингдек Эрон томонидан Ҳўрмуз бўғозининг тўсиб қўйилишини ҳарбий йўл билан бекор қилиш масаласи ҳам муҳокама қилинмоқда.

Reuters аниқлик киритишича, бунинг учун Америка қўшинларини Эрон соҳилига жойлаштириш зарур бўлиши мумкин, гарчи агентлик манбалари айтишича, бундай операция асосан мамлакатнинг денгиз ва ҳарбий-ҳаво кучлари томонидан амалга оширилади. Яна бир сценарий — Форс кўрфазидаги Харк оролига қуруқликдаги бўлинмаларни юбориш. Бу орол Эрон нефти экспорти маркази ҳисобланади. Манбалар бундай вариантни хатарли деб атаган, чунки Эрон оролга ракета ва дронлар билан зарба бериш имкониятига эга.

Бундан ташқари, журналистлар таъкидлашича, Америка маъмурияти Эрондаги бойитилган уран захиралари устидан назорат ўрнатиш учун ҳам қўшин юбориш вариантини кўриб чиқмоқда. Бундан олдин Axios нашри ҳам АҚШ ва Исроил ҳокимиятлари ўртасида шундай муҳокамалар бўлганини ёзган эди. Ўшанда бу “фақат икки давлат ҳам Эрон ҳарбийлари иштирок этаётган кучлар учун энди жиддий таҳдид сола олмаслигига ишонч ҳосил қилгандан кейингина” юз бериши мумкинлиги қайд этилган эди.

АҚШ ва Исроил Эронга қарши илк ҳаво зарбаларини 28 феврал куни берди. Шундан кейин Теҳрон Форс кўрфази минтақасидаги қўшни давлатлар ва Исроилга ракета ҳамда дронлар ёрдамида ҳужум қила бошлади. Ислом Республикаси баёнотларига кўра, ҳужумлар нишонлари орасида минтақадаги Америка ҳарбий базалари ҳам бўлган.

Эрон зарбалари Форс кўрфазидаги қатор давлатлардаги нефт омборлари ва нефт танкерларига ҳам теккан. Эрон ҳужумларидан Озарбойжон ҳамда Европа Иттифоқи таркибига кирувчи Кипр ҳам жабр кўрган.

АҚШ ва Исроил ҳарбий операцияси шароитида Теҳрон нефт ва газ етказиб бериш учун муҳим бўлган Ҳўрмуз бўғози орқали ҳаракатни амалда тўсиб қўйди ва уни “тўлиқ назорат қилаётгани”ни билдирди. Бу эса энергия ташувчилар нархининг ошишига олиб келди.