Зеленский АҚШ билан навбатдаги музокаралар босқичини эълон қилди

Россиянинг Украинага қарши урушига барҳам бериш масаласи бўйича Украина ва АҚШ делегациялари ўртасидаги навбатдаги музокаралар 21 март куни бўлиб ўтади, деди Володимир Зеленский 19 март, пайшанба куни кечки мурожаатида. Унинг сўзларига кўра, Киевнинг музокарачи гуруҳи аллақачон АҚШга йўл олган.

“Америка томонидан Россиянинг Украинага қарши урушига чек қўйиш учун мавжуд музокара форматларида ишни давом эттиришга тайёрлик ҳақида сигналлар бор”, — деди Зеленский. У жанговар ҳаракатларни тўхтатиш бўйича дипломатик саъй-ҳаракатларда танаффус юзага келганини тасдиқлади, аммо энди “уни якунлаш вақти келганини” таъкидлади.

“Биз музокаралар ҳақиқатан ҳам мазмунли бўлиши учун барча ишни қиляпмиз. Украина жамоаси — айнан музокарачи гуруҳнинг сиёсий қисми аллақачон йўлга чиққан, шу шанба куни биз Америка Қўшма Штатларида учрашув кутмоқдамиз”, — дея давом этди Украина президенти.

Володимир Зеленскийнинг айтишича, шу куннинг ўзида у делегация аъзолари билан музокараларни батафсил муҳокама қилган: делегацияга раҳбарлик қилаётган Украина Миллий хавфсизлик ва мудофаа кенгаши котиби Рустем Умеров, мамлакат президенти офиси раҳбари Кирилл Буданов ва парламентдаги “Халқ хизматкори” фракцияси раиси Давид Арахамия билан. Бундан ташқари, учрашувда президент офиси раҳбарининг биринчи ўринбосари Сергей Кислица ҳам иштирок этади.

18 март куни Германия канцлери Фридрих Мерц яна бир бор Европа давлатлари Украинадаги урушни якунлаш бўйича музокаралар столи атрофида бўлиши шарт, деган фикрни билдирди.

“Музокаралар Украина боши узра ва европаликлар боши узра — фақат Россия билан АҚШ ўртасида олиб борилишига йўл қўйиб бўлмайди”, — деди у Бундестагда. Шу билан бирга, у АҚШ ва европалик ҳамкорларни Москвага босимни биргаликда кучайтиришга чақирди.

Германия ҳукумати раҳбари Берлинда Россия иқтисодиёти “ушбу уруш ва бизнинг санкцияларимиздан жиддий азият чекаётгани” ҳақида “ишончли маълумотлар” борлигини айтди. Унинг сўзларига кўра, айнан шу омил Европа Иттифоқи ва АҚШга босимни давом эттириши керак бўлган дастак ҳисобланади.