Ўзбекистон Ҳиндистон билан бизнес алоқаларни фаоллаштиришга киришди

“Дунё” АА хабар қилишича, музокаралар давомида апрель ойида Тошкентда бўлиб ўтадиган Ўзбекистон ва Ҳиндистон ўртасидаги Савдо-иқтисодий ва илмий-техникавий ҳамкорлик бўйича Ҳукуматлараро қўшма комиссия йиғилишига тайёргарлик масалалари муҳокама қилинди.

Элчи мазкур йиғилиш доирасида Тошкент ва Самарқанд шаҳарларида бизнес-форумлар ташкил этишни таклиф қилди. Ушбу тадбирларда икки мамлакатнинг етакчи тадбиркорлари иштирокини таъминлаш муҳимлиги таъкидланди.

Жйоти Виж FICCI томонидан нуфузли ҳинд бизнес-делегациясининг Ўзбекистонга ташрифини ташкил этишда кўмаклашишга тайёрлигини билдирди.

Шунингдек, апрел ойининг биринчи ярмида ҳинд компаниялари ҳамда Ўзбекистоннинг манфаатдор вазирлик ва тармоқ ташкилотлари иштирокида онлайн учрашув ўтказиш бўйича келишувга эришилди.

Маълумот учун, FICCI Ҳиндистоннинг энг йирик бизнес-ассоциацияларидан бири бўлиб, 250 мингдан ортиқ компанияни бирлаштиради ҳамда мамлакат ҳукумати билан иқтисодий сиёсат ва инвестиция масалаларида яқин ҳамкорлик қилади.