Словенияда либераллар консерваторларни минимал устунлик билан ортда қолдирди

22 март, якшанба куни Словенияда бир палатали парламентга бўлиб ўтган сайловларда бош вазир Роберт Голобнинг “Озодлик ҳаракати” (GS) партияси ва Венгрия бош вазири Виктор Орбаннинг яқин иттифоқчиси бўлган Янез Янша бошчилигидаги ўнг қанотдаги Словения демократик партияси (СДП) сайловчилар овозларининг деярли тенг миқдорини қўлга киритди.

Икки асосий рақибдан ҳеч бири парламентдаги 90 ўриндан 46 тасини ташкил этувчи мутлақ кўпчиликни таъминлай олмади.

Сайлов комиссияси 99,85 фоиз бюллетенлар санаб чиқилганидан кейин маълум қилишича, “Озодлик ҳаракати” 28,62 фоиз натижа билан минимал ғалабага эришган, СДП эса 27,95 фоиз овоз олган.

Словения парламентига 5 фоизлик тўсиқдан ўтган яна етти партия ҳам кирди — улар орасида янги ҳукмрон коалицияни шакллантиришда ҳал қилувчи рол ўйнаши мумкин бўлган сиёсий кучлар ҳам бор.

Словениядаги парламент сайловларида ўндан ортиқ сиёсий партия ва коалиция иштирок этди. Жами 1300 дан зиёд номзод кўрсатилди, улар кенг сиёсий спектрни ифода этди.

Бош вазир Голобнинг асосий сиёсий рақиби Янез Янша — популист қарашларга эга сиёсатчи ва АҚШ президенти Доналд Трамп мухлиси — аввал ҳам уч марта Словения ҳукумати раҳбари лавозимини эгаллаган эди.

Голоб эса 2022 йилда катта сиёсатга янги кириб келган шахс сифатида ҳокимиятга келган ва учта марказ-сўл йўналишидаги партиядан иборат коалицияга раҳбарлик қилган.

Янез Янша Виктор Орбаннинг иттифоқчиси сифатида кўрилади.

“Словения кичик Болқон давлати бўлса-да (Болқон ярим оролининг олд Алп қисмида жойлашган — таҳ.), у ерда ўтаётган сайловларни Европада нолиберал тенденциялар кучайиб бораётганининг яна бир белгиси сифатида кўриш мумкин”, — деди Роберт Шуман жамғармаси эксперти Хелен Леви.

1991 йил июнда Словения собиқ Югославия Социалистик Федератив Республикаси (ЮСФР)дан мустақиллигини эълон қилган биринчи мамлакат бўлган.

Аввалроқ, 18 март куни Словения Разведка ва хавфсизлик агентлиги (SOVA) мамлакатдаги парламент сайловлари сайловолди кампаниясига хорижий аралашув бўлганини тасдиқлади.

Бундан олдин словен оммавий ахборот воситалари 2025 йил декабрида Любляна шаҳрида Исроил махсус хизматларининг собиқ ходимлари томонидан асос солинган халқаро хусусий разведка ва таҳлил компанияси Black Cube вакиллари билан Янез Янша ўртасида учрашув бўлиб ўтгани ҳақида хабар берган эди.

AFP агентлиги маълум қилишича, Словения ҳукумати Black Cube бош вазир Голоб ҳукуматини коррупциялашган деб кўрсатувчи яширинча тасвирга олинган видеолар ортида турган-турмаганини ўрганган.

СДП эса Black Cube билан ҳамкорлик қилгани ҳақидаги айбловларни рад этган.