Рубио Зеленский баёнотини очиқчасига ёлғон деб атади

АҚШ Давлат департаменти раҳбари Марко Рубио Украина президенти Володимир Зеленский Америка томони музокаралар чоғида Киевга хавфсизлик кафолатларини Украина Қуролли кучларининг Донбассдан тўлиқ чиқиши билан боғлагани ҳақида ёлғон гапирганини айтди. Сиёсатчи бу баёнотни 27 март, жума куни Париж яқинидаги Ле-Бурже аэропортида журналистлар саволларига жавоб берар экан билдирди.

“Бу ёлғон. Мен унинг буни айтаётганини кўрдим. Унинг бундай дегани жуда ачинарли, чунки у бу гап ҳақиқат эмаслигини билади. Бу унга айтилган нарса эмас. Унга оддий бир ҳақиқат айтилди: хавфсизлик кафолатлари уруш тугамагунча кучга кирмайди. Аммо бу ‘фақат ҳудуддан воз кечса’ деган шартга боғланмаган эди. У нега бундай гапираётганини билмайман. Бу шунчаки ҳақиқат эмас”, — дейилади Рубионинг АҚШ Давлат департаменти сайтида келтирилган сўзларида.

Давлат котиби таъкидлашича, АҚШ фақат Украина томонига Россиянинг талабларини етказган, аммо Киевдан ҳудудий ён беришни талаб қилмаган. “Биз ҳеч қачон уларга бунга рози бўлиши керак деб айтмаганмиз. Оқибатда қарор Украина ихтиёрида қолади. Агар улар муайян қарорлар ёки муайян ён беришларга рози бўлишни истамаса, демак, уруш давом этади. Худди шу нарса Россия томонига ҳам тегишли: агар улар Украина томонига муайян ён беришларга боришни истамаса, у ҳолда уруш ҳам давом этаверади”, — деди Рубио.

Россия президенти Владимир Путин камида 2025 йил кузидан бери Украинадаги урушни тўхтатиш шарти сифатида Украина Қуролли кучларининг Донбасс ҳудудидан чиқишини бир неча бор тилга олиб келмоқда. Россия етакчисининг айтишича, ҳозир бу минтақанинг 15–17 фоизи Киев назоратида қолмоқда.

Шу муносабат билан Зеленский март ойи охирида АҚШ Украинага тинчлик музокаралари давомида ваъда қилинган хавфсизлик кафолатларини беришни Донецк вилоятини Россияга топширишга боғлаётганини айтди. “Америкаликлар Украина Донбассдан қўшинларини чиқаришга тайёр бўлиши билан бу кафолатларни юқори даражада беришга тайёр”, — деган эди у.

Феврал бошида Зеленский яна шуни айтган эдики, АҚШ урушни июнгача тугатишда қаттиқ турибди. “Америкаликлар томонларга урушни шу ёз бошигача тугатишни таклиф қилмоқда ва эҳтимол, томонларга айнан шу жадвал асосида босим ўтказади”, — деган эди Украина раҳбари. У бундай муддатларни 2026 йил ноябрига режалаштирилган АҚШ Конгресси сайловлари билан боғлаган.

АҚШ Давлат департаменти раҳбари 27 март куни журналистлардан бирининг НАТО томонидан Украина учун PURL дастури — Prioritised Ukraine Requirements List (“Украина учун устувор талаблар рўйхати”) доирасида сотиб олинган Америка қуролини АҚШнинг Исроил билан бирга 28 февралдан буён Эронга қарши уруш олиб бораётган Яқин Шарққа йўналтириш эҳтимоли ҳақидаги саволига ҳам жавоб берди.

“Ҳозирча бундай бўлгани йўқ. Ҳали ҳеч нарса қайта йўналтирилмади, аммо бу мумкин. Агар Америка учун бирор нарса керак бўлса ва у Американики бўлса, биз биринчи навбатда уни Америка учун ишлатамиз. Лекин ҳозирча PURL бу операция таъсирига тушгани йўқ”, — деди Рубио.