АҚШ Россиянинг Кубага кетаётган нефт танкерини тўхтатмади

АҚШ кемалари Кубага 730 минг баррел нефт олиб бораётган Россия кемасини ушлаб қолмади. Доналд Трамп эса, оролга нисбатан аввалроқ эълон қилинган блокадага қарамай, бундай етказиб беришларда “муаммо кўрмаётганини” билдирди.

Фото: Adalberto Roque/AFP

АҚШ Қирғоқ қўриқлаш хизмати Кубага 730 минг баррел нефт олиб кетаётган Россиянинг “Анатолий Колодкин” танкерини ушлаб қолмади. Associated Press агентлиги 30 март, душанбага ўтар кечаси хабар беришича, ушбу кема оролнинг шарқий чеккаси яқинига етиб келган ва 31 мартга қадар Кубанинг Матанас портига кириб бориши мумкин.

Куба яқинида АҚШ Қирғоқ қўриқлаш хизматининг икки патрул катери жойлашган. The New York Times газетаси 29 март куни ушбу кемаларга, Америка президенти Доналд Трамп аввалроқ эълон қилган амалдаги блокадага қарамай, Россиянинг нефт танкерини тўхтатиш бўйича буйруқ берилмаганини ёзган эди.

Трампнинг ўзи душанбага ўтар кечаси журналистларга, “агар қайсидир давлат ҳозир Кубага маълум миқдорда нефт юборишни истаса”, бунда у “муаммо кўрмаётганини”, “бу Россия бўладими-йўқми, фарқи йўқ”лигини айтди. “Кимдир шундай етказиб беришни амалга оширса, биз қарши эмасмиз, чунки уларга бу керак, улар тирик қолиши керак”, — дея қўшимча қилди Оқ уй раҳбари.

The New York Times сўровига жавоб берган экспертлар фикрича, Россия нефт танкерининг етиб келиши Кубани камида бир неча ҳафтага етадиган ёнилғи захираси билан таъминлайди.

АҚШнинг Кубанинг энг яқин иттифоқчиси бўлган Венесуэлага ҳужум қилиши ва унинг раҳбари Николас Мадуро қўлга олинганидан кейин, Каракас кубаликларга нефт етказиб беришни тўхтатди. Январ охирида Трамп Кубани “АҚШ миллий хавфсизлиги учун ўта жиддий таҳдид” деб атади ва Ҳаванага нефт ёки нефт маҳсулотлари етказиб беришда давом этадиган барча давлатларга жарима божлари жорий этиш билан таҳдид қилди. 16 ва 21 март кунлари Кубада ёнилғи танқислиги кескинлашгани сабабли икки марта умуммиллий электр узилиши юз берди.

16 март куни Доналд Трамп яна шуни айтдики, у Кубани “озод қилиши, эгаллаб олиши” ва умуман у билан “истаган ишини қилиши” мумкин, чунки бу “жуда заифлашган мамлакат”дир. Куба президенти Мигел Диас-Канел бунга жавобан “қатъий қаршилик” кўрсатишга тайёр эканини билдирди.

Шу куни NBC News телеканали эълон қилган интервюда Куба бош вазири ўринбосари Оскар Перес-Олива Ҳавана “АҚШ компаниялари, шунингдек АҚШда яшовчи кубаликлар ва уларнинг авлодлари билан мослашувчан савдо муносабатларига тайёр” эканини айтди. Бироқ АҚШ давлат котиби Марко Рубио бу ён беришни Трамп маъмурияти Кубада кўришни истаётган эркин бозорни шакллантириш ислоҳотлари учун етарли эмас, деб баҳолади.