Трамп Эрон сулҳ сўраганини айтди

Эрон ҳукумати АҚШга ўт очишни тўхтатишни сўраб мурожаат қилди, деди Қўшма Штатлар президенти Доналд Трамп.

«Эроннинг аввалгиларига қараганда мўътадилроқ ва ақллироқ бўлган янги режими президенти ҳозиргина АҚШдан ўт очишни тўхтатишни сўради! Ҳўрмуз бўғози очилиб, эркин ва хавфсиз бўлганида биз буни кўриб чиқамиз», – дея ёзган Трамп Truth Social ижтимоий тармоғида.

У шу шарт бажарилмагунича АҚШ Эрон бўйлаб зарбалар беришда давом этиши ҳамда «уни тош асри даврига улоқтириши»ни қўшимча қилган.

Аввалроқ Трамп журналистлар қаршисида АҚШ Эрон билан урушга «икки-уч ҳафта»дан кейин якун ясаш ниятида эканини, шу билан бирга, бунинг учун Вашингтон Теҳрон билан келишув тузиши шарт эмаслигини айтганди.

«Эрон битим тузиши шарт эмас, йўқ... Балки келишув тузармиз, чунки улар келишув тузишни хоҳлайди. Улар битим тузишни мендан кўра кўпроқ истайди. Аммо жуда қисқа вақт ичида [операцияни] якунлаймиз», – деганди Трамп.

У АҚШ Эрон билан урушдан кўзлаган мақсадига эришганини таъкидлаган. «Уларда режим ўзгарди. Режимни ўзгартириш мен қўйган мақсадларга кирмасди. Менинг мақсадим битта эди: уларда ядро қуроли бўлмайди. Ва бу мақсадга эришилди. Уларда ядро қуроли бўлмайди», – деган АҚШ президенти.

Оқ уй раҳбари, шунингдек, Ҳўрмуз бўғозини очиш масаласини бошқа давлатлар ҳал қилиши кераклигини айтган. «Агар Франция ёки бошқа бирор мамлакат нефт ёки газ олмоқчи бўлса, улар бўғоз орқали ўтади. Улар тўғри ўша ерга боради ва ўзлари ҳақида ўзлари қайғура олади. Менимча, аслида бу жуда хавфсиз бўлади, лекин бизнинг бунга алоқамиз йўқ. Бўғозда нима содир бўлаётгани билан ишимиз йўқ – биз бунга аралашмоқчи эмасмиз», – деган у.

АҚШ ва Исроилнинг Эронга қарши уруши бошланганига бир ойдан ошди. Ҳарбий ҳаракатлар бошланганидан кейин Эрон жаҳондаги денгиз орқали экспорт қилинадиган нефтнинг бешдан бир қисми ўтадиган Ҳўрмуз бўғозини ёпиб қўйганди.

Сўнгги кунларда Доналд Трамп бир неча бор АҚШ ҳарбий ҳаракатларни якунлашга яқин экани ҳақида гапирди. The Wall Street Journal манбаларига кўра, Трамп ўз ёрдамчил Ҳўрмуз бўғози очилмаса ҳам урушни якунлашга тайёрлигини айтган.

ОАВда тарқалган хабарларга кўра, АҚШ Эронга 15 банддан иборат тинчлик режасини тақдим этган. Теҳрондагилар уни «бир томонлама ва адолатсиз» деб топиб, Вашингтонга ўз таклифларини юборган. У ҳарбий ҳаракатларни тўхтатиш, бошқа ҳужум қилмаслик учун кафолат ҳамда етказилган зарар учун товон тўланиши ҳақидаги талабларни ўз ичига олган.

Шу билан бирга, Эрон ташқи ишлар вазири Аббос Ароқчи томонлар тўлақонли музокаралар олиб бормаётгани, фақат воситачилар орқали мулоқот қилаётганини айтган.