Зеленский: Украина АҚШ учун энди устувор эмас

Украина президенти Володимир Зеленский АҚШ ва Исроилнинг Эронга қарши давом этаётган уруши Украинага кўрсатилаётган ёрдамни янада заифлаштириши мумкинлигидан хавотир билдирди. Бу ҳақда у 5 апрел куни Истанбулга ташрифи чоғида Associated Press (AP) агентлигига берган интервюсида айтди.

Фото: Mehmet Guzel & Serra Yedikardes

“Биз тан олишимиз керакки, ҳозир биз (АҚШ учун) устувор йўналиш эмасмиз. Шунинг учун мен Эрондаги узоқ давом этадиган уруш бизга камроқ ёрдам келтиришидан қўрқаман”, — деди Зеленский.

Унинг таъкидлашича, Киев аввалданоқ Россия агрессиясига қарши курашиш учун зарур бўлган Patriot ҳаво мудофаа тизимлари ва улар учун ракеталарни етарли миқдорда олмаётган эди. Агар Эрон билан уруш тез орада тугамаса, Украинага ёрдам пакети “кундан-кунга камайиб бориши” мумкин.

Шунингдек, Зеленский АҚШ томонидан Россия нефтига нисбатан санкциялар вақтинча юмшатилгани Москвага иқтисодий жиҳатдан фойда келтираётганини таъкидлади: “Россия бундан қўшимча даромад оляпти, демак, улар учун бу фойдали”, — деди у.

АҚШ 11 апрелга қадар 12 мартгача кемаларга юкланган Россия нефти ва нефт маҳсулотлари савдосини санкциялардан вақтинча чиқарди. АҚШ молия вазири Скотт Бессентнинг айтишича, бу қарор президент Доналд Трамп томонидан жаҳон энергетика бозорини барқарор сақлаш ва нархларни оширмаслик мақсадида қабул қилинган.

Шу билан бирга, 11 март куни G7 давлатлари Эрон билан уруш фонида Россия нефтига нисбатан санкцияларни бекор қилмасликка келишиб олган эди.

1 апрел куни Financial Times нашри ёзишича, Доналд Трамп Европа давлатлари Ҳўрмуз бўғозини очишга ёрдам бермаса, Украинага қурол етказиб беришни тўхтатиш билан таҳдид қилган.

Шунингдек, Washington Post маълумотига кўра, Пентагон Украина учун мўлжалланган муҳим ҳарбий техникани Эрон билан урушга йўналтириш имкониятини кўриб чиқмоқда.

28 февралдан буён АҚШ ва Исроил Эронга авиа зарбалар бермоқда. Натижада Эроннинг олий раҳбари Али Хоминаий ва бир қатор юқори лавозимли амалдорлар ҳалок бўлгани хабар қилинди.

Эрон эса жавоб тариқасида Форс кўрфази минтақасидаги қўшни давлатларга ракета ва дронлар билан зарбалар бермоқда. Теҳроннинг таъкидлашича, бу ҳужумлар АҚШ ҳарбий базаларига қаратилган.

Шу билан бирга, Эрон ҳужумлари нефт омборлари ва танкерларга ҳам таъсир қилди. Озарбойжон ва Кипр ҳам зарбалардан жабр кўргани хабар қилинмоқда.