Эрон Ҳўрмуз бўғозидан ўтиш учун криптовалютада тўлов талаб қилди

Эрон кема эгаларидан Ҳўрмуз бўғозидан ўтиш учун криптовалюта билан тўлов қилишни талаб этмоқда, деб ёзди Financial Times.

Эрон нефть, газ ва нефть-кимё маҳсулотлари экспортчилари уюшмаси раиси Ҳамид Ҳусайнийнинг нашрга айтишича, тўлов ҳар бир олиб ўтилган баррель учун бир долларга тенг бўлади; бўш танкерлар бўғоздан бепул ўтиши мумкин.

Ҳусайнийнинг таъкидлашича, криптовалютадаги тўлов транзакцияларни кузатув ва эҳтимолий санкциялардан ҳимоя қилиш учун танланган. Кемалар бўғоз орқали ҳаракатланишни бошлашдан олдин Эрон расмийларини хабардор қилиши ва уларнинг рухсатини олиши керак - Эрон қоидабузарларни «йўқ қилиш» билан таҳдид этмоқда.

АҚШ, Исроил ва Эрон 8 апрелга ўтар кечаси урушни вақтинча тўхтатиш бўйича келишувга эришди. Бу битимнинг асосий шарти — Эроннинг Ҳўрмуз бўғози орқали кема қатновини очиши.

Сулҳ икки ҳафта муддатга тузилган бўлиб, бу даврда томонлар бевосита музокаралар орқали якуний тинчлик ҳақида келишиб олишга ҳаракат қилади.