АҚШ Ҳўрмуз бўғозини куч билан очмоқчи

Америкалик ҳарбийлар Яқин Шарқдаги катта уруш бошида Эрон томонидан тўсиб қўйилган Ҳўрмуз бўғозини очишга қаратилган амалиёт бошлаган. Бу ҳақда АҚШ президенти Доналд Трамп маълум қилди.

У Эроннинг бутун флоти, жумладан, мина ўрнатувчи 28 та кема ҳам аллақачон Америка ҳарбийлари томонидан чўктириб юборилганини айтган.

«Уларнинг флоти йўқ қилинди, уларнинг ҳарбий-ҳаво кучлари яксон этилди, уларда энди ҳаво ҳужумидан мудофаа кучлари мавжуд эмас, радарлари ишламаяпти, уларнинг ракеталар ва дронлар ишлаб чиқариладиган заводлари ракеталар ва дронларга қўшиб йўқ қилинди, энг асосийси уларнинг кўп йиллик „етакчилари“ энди йўқ <...> Ягона хавф – кемалар уларнинг денгиз миналарига „тушиб қолиши“ мумкинлигида, дарвоқе, уларнинг 28 та мина ўрнатувчилари ҳам аллақачон сув тубида ётибди», – дея ёзган Трамп Truth Social ижтимоий тармоғида.

Ҳозир биз бутун дунё мамлакатлари, жумладан, Хитой, Япония, Жанубий Корея, Франция, Германия ва бошқа кўплаб давлатларга хизмат кўрсатиш мақсадида Ҳўрмуз бўғозини тозалаш жараёнини бошлаяпмиз. Ажабланарлиси шундаки, бу ишни мустақил бажариш учун уларнинг ўзида на журъат ва на ирода бор.

11 апрел куни АҚШ ҳарбий-денгиз кучларининг камида битта эсминеци – USS Michael Murphy Ҳўрмуз бўғози орқали сузиб ўтган.

Axios нашри журналисти Барак Равид америкалик мулозимларга таяниб, 11 апрел куни Американинг бир неча ҳарбий кемаси Ҳўрмуз бўғози орқали сузиб ўтганини хабар қилди. Манбаларнинг сўзларига кўра, бу қадам Эрон билан келишилмаган ва уруш бошидан буён илк бор кузатилган.

Равиднинг ёзишича, ҳарбий кемалар бўғозни шарқдан ғарбга қараб кесиб ўтган, кейин эса ортга бурилиб, Араб денгизига қайтган. Эронлик ҳарбийлар эса Америка ҳарбий кемаси Теҳрон томонидан билдирилган огоҳлантиришдан кейин ортга қайтгани ва бўғоз сувларини маълум қилган.

АҚШ Марказий ҳарбий қўмондонлиги ҳам кейинроқ 11 апрел куни Американинг «Фрэнк Питерсон» (USS Frank E. Peterson) ва «Майкл Мёрфи» (USS Michael Murphy) номли эсминецлари бўғоз Ислом инқилоби муҳофизлари корпуси томонидан ўрнатилган денгиз миналаридан тўлиқ тозаланишини таъминлашга қаратилган кенгроқ миссия доирасида ҳаракат қилганини маълум қилди.

Ҳўрмуз бўғозини миналардан тозалаш ишлари билан Littoral Combat Ship соҳил ҳудуди ҳарбий кемалари шуғулланиши керак. Америка эсминецлари эса уларни ва бўғоз орқали ўтувчи танкерларни қўриқлаши кўзда тутилган. Америка эсминецлари бўғоз сувларида ҳаракатлангани амалда Ҳўрмуз бўғозини куч билан очишни англатади.

Исломобод АҚШ ва Эрон делегацияларида ўтказилган музокараларда натижаларга эришилмаганидан кейин Трамп ижтимоий тармоқдаги саҳифасида энди АҚШ Эронни денгиз орқали қамал қилиши мумкинлиги ҳақидаги мақола ҳаволасини жойлаштирди.

• Эрон АҚШ ва Исроил томонидан бошланган урушнинг илк кунидаёқ Ҳўрмуз бўғозини ёпгани ҳақида эълон қилган ва рухсатсиз ҳаракатланган танкерларни дронлар ва ракеталар билан ўққа тутишга киришган. Уруш бошидан буён бундай ҳужумлар билан боғлиқ 28 та ҳолат қайд этилган, кемаларга ҳужумлар 8 апрел куни эълон қилинган вақтинчалик сулҳ даврида ҳам давом этган.
• Бундан ташқари, Теҳрон кемалар эгаларига асосий сув йўли миналар туфайли хавфсиз эмаслигини маълум қилиб, уларга Эрон соҳиллари яқинидаги янги йўналиш бўйлаб ҳаракатланишни таклиф қилган. Аммо бўғоз миналангани бўйича далиллар йўқ. Эроннинг мина ўрнатувчи кемаларининг аксари урушнинг илк кунларидаёқ чўктириб юборилган.