Трамп Эронни ўн йил электрсиз қолдириш билан таҳдид қилди

АҚШ президенти Доналд Трамп электр станцияларини йўқ қилиш орқали Эронни ўн йил электрсиз қолдириш билан таҳдид қилди.

Фото: REUTERS

"Биз уларга зарба беришимиз мумкин. Шундай қиламизки, сизлар ўн йил давомида электрсиз қоласизлар", - деди у Fox News телеканалига берган интервюсида.

Америка президентининг қўшимча қилишича, АҚШ бундай зарба берган тақдирда Эрон электр станцияларини қайтадан қуришига тўғри келади.

У шунингдек, Қўшма Штатлар Эрондаги кўприкларни ҳам йўқ қилишга тайёрлигини айтди.

11-12 апрел кунлари Исломободда АҚШ ва Эрон делегациялари учрашуви бўлиб ўтди. Америка делегацияси таркибидан вице-президент Жей Ди Вэнс, махсус вакил Стив Уиткофф ва Доналд Трампнинг куёви Жаред Кушнер ўрин олган. Эрон томонидан эса парламент раиси Муҳаммад Боқир Ғолибоф ва ташқи ишлар вазири Аббос Ароқчи иштирок этди.

Музокаралардан сўнг АҚШ вице-президенти Жей Ди Вэнс Эрон Америка томонининг шартларини қабул қилмагани ва ядро қуролини ишлаб чиқиш ниятидан воз кечишни хоҳламаётганини айтди. Эрон ташқи ишлар вазирлиги эса томонлар икки-учта масала бўйича келиша олмаганини маълум қилиб, музокаралар давом этишига умид билдирди.