Туркияда ўқотар қурол назорати кучайтирилади

Туркияда ўқотар қуролга эгалик қилишни чеклайдиган чоралар кўрилади, шунингдек, қурол эгалари учун жазолар янада кучайтирилади. Бу ҳақда Туркия президенти Ражаб Тоййиб Эрдўған маълум қилди.

Тегишли чоралар ўтган ҳафта маҳаллий мактабларда содир бўлган икки отишма ҳодисасидан кейин эълон қилинди.

«Мактабларимизда хавфсизликни таъминлаш бизнинг энг устувор вазифамиздир. Бу масалада ҳозир ҳам, келажакда ҳам ҳеч қандай ён бериш бўлмайди. Биз ўқотар қурол эгалари, агар улар уни хавфсиз сақлаш ва муҳофаза қилиш бўйича ўз мажбуриятларини бажармаса, уларга нисбатан жазоларни кучайтирамиз. Шунингдек, қуролга эгалик қилишни чеклайдиган қўшимча ҳуқуқий меъёрларни жорий этамиз», — деди Туркия етакчиси.

Эрдўғаннинг айтишича, Қаҳрамонмараш вилоятидаги мактабда содир бўлган ҳодиса оқибатида тўққиз киши ҳалок бўлган, 21 киши жароҳат олган. Шу минтақадаги Шанлиурфа вилояти мактабида эса 19 киши яраланган.

«Ижтимоий тармоқлар ва рақамли коммуникация платформаларида ёлғон, манипулятив ва зарарли контент тарқатаётган аккаунтларга нисбатан зарур чораларни кўрдик», — деди у.

Туркия президентининг сўзларига кўра, мамлакат ҳукумати виртуал патруллашни кучайтириш ва ҳуқуқни муҳофаза қилувчи органларнинг киберхавфсизлик соҳасидаги салоҳиятини мустаҳкамлаш ниятида.