Эрдўған Россия ва Украина музокараларини қайта бошлашга бел боғлади

Туркия 28 февралдан бери, яъни АҚШ ва Исроилнинг Эронга қарши уруши бошланганидан сўнг амалда тўхтаб қолган Россия ва Украина ўртасидаги тинчлик музокараларини қайта жонлантириш учун саъй-ҳаракат қилмоқда. Бу ҳақда мамлакат президенти Ражаб Тоййиб Эрдўған 22 апрель, чоршанба куни Анқарада НАТО бош котиби Марк Рютте билан учрашувда маълум қилди. Учрашув мазмуни ҳақида Reuters агентлиги турк президенти матбуот хизматига таяниб хабар берган.

“Эрдўған Туркия Россия ва Украина ўртасидаги уруш тинч йўл билан якунланишидан манфаатдор эканини, шунингдек, музокараларни қайта тиклаш ва мулоқотни лидерлар даражасида бошлаш устида иш олиб борилаётганини айтди”, — дея келтирган агентлик президент маъмурияти изоҳини.

Кейинроқ Эрдўған матбуот хизмати Германия президенти Франк-Вальтер Штайнмайер билан бўлиб ўтган телефон мулоқоти ҳақида ҳам маълумот берди. Суҳбат чоғида Туркия раҳбари, жумладан, АҚШ ва Исроилнинг Эронга қарши уруши “Европани ҳам заифлаштира бошлаганини” таъкидлади. Шу билан бирга, у Украинадаги урушни ҳам тилга олди: “Президент Эрдўған Туркия, Эрон масаласида бўлгани каби, Россия ва Украина ўртасидаги уруш якунларига кўра мустаҳкам тинчликка эришиш ва можарони музокаралар орқали тугатиш учун саъй-ҳаракат қилаётганини билдирди”.

Яқинда Украина ташқи ишлар вазири Андрей Сибига 17–19 апрель кунлари бўлиб ўтган Анталия дипломатия форумида қатнашиб, “Укринформ” давлат агентлигига берган интервьюсида Киев Анқарага Россия ва Украина президентлари Владимир Путин ҳамда Володимир Зеленский учрашувини ташкил этиш имкониятини кўриб чиқишни сўраб мурожаат қилганини айтди. Унинг сўзларига кўра, имконият бўлса, бу тадбирда Эрдўған ва АҚШ президенти Дональд Трамп ҳам иштирок этиши мумкин.

“Биз бу урушга нуқта қўйишни истаймиз. Бизнинг амалий таклифларимиз бор. Туркиянинг ролига умид қиляпмиз, чунки у тинчлик жараёнини тезлаштириши мумкин”, — деган эди Сибига.

Сибиганинг ушбу баёноти ортидан Путин матбуот котиби Дмитрий Песков журналистлар билан суҳбатда Россия президентининг Зеленский билан учрашуви “фақат келишувларни якунийлаштириш учун” мумкинлигини айтди. У шунга ўхшаш баёнотларни, масалан, 2025 йил май ва июль ойларида ҳам берган эди.