Нақдсиз савдо бўйича янги талаблар юмшатилиши мумкин

Ўзбекистонда кафе-ресторанлар ва меҳмонхоналарда алкогол маҳсулотлари учун нақд пулда тўлов қилишга рухсат берилиши кутилмоқда.

Бу ҳақда 21 апрел куни умумий овқатланиш соҳасидаги тадбиркорлар билан очиқ мулоқотда маълум қилинди.

Мулоқотда сўз олган тадбиркор алкогол маҳсулотларини фақат нақдсиз сотиш тартиби кучга киргач, туристлар билан ишлаш қийинлашганини айтди.

Солиқ қўмитаси раиси Фаррух Пўлатов бунга жавобан яқин кунларда масалага ечим берилишини маълум қилди.

“Бу – бизнинг айбимиз, эътиборсизлигимиз. Бу бўйича ишлаяпмиз ва яқин кунларда ечим тақдим этамиз – тўғрилаб берамиз”, – деди у.

Пўлатовнинг таъкидлашича, амалдаги тизимда мижозлар ноқулай вазиятга тушиб қолмоқда – масалан, овқат учун нақд пул тўлаш мумкин, бироқ алкогол учун алоҳида карта орқали тўлов қилиш талаб этилади.

Мазкур муаммони бартараф этиш мақсадида Солиқ қўмитаси томонидан тегишли ҳужжат лойиҳаси ишлаб чиқилган. Унга кўра, ресторан ва меҳмонхоналарда алкогол учун ҳам нақд, ҳам нақдсиз тўлов имкониятини жорий этиш режалаштирилмоқда. Ҳозирда лойиҳа манфаатдор идоралар билан келишув босқичида.

Савдо-саноат палатаси раиси Даврон Ваҳобов ҳам амалдаги тартиб сайёҳлар учун жиддий тўсиқ бўлаётганини қайд этди:

“Агар хорижий сайёҳ меҳмонхонада спиртли ичимликларни нақд пулга сотиб олмоқчи бўлса, у Uzcard ёки Humo картасини очиш учун банкка боришига тўғри келади. Натижада ичишни хоҳлаган сайёҳ ичгиси ҳам келмай қолиб, самолётга ўтириб, орқасига қайтиб кетяпти”.

Эслатиб ўтамиз, 1 апрелдан бошлаб Ўзбекистонда бир қатор товарлар, хусусан алкогол ва тамаки маҳсулотларини ҳам нақд пулга сотиш тақиқланган эди. Бундай харидлар фақат нақд пулсиз шаклда амалга оширилиши белгиланган.

Мазкур тартиб доирасида бензин ва дизел, метан ва пропан каби ёқилғиларни ҳам нақд пулга сотиш тўхтатилгани кўплаб эътирозларга сабаб бўлиб келмоқда.