Уйқуда бош ҳолатини ўзи ўзгартирадиган Mirukuru ёстиғи тақдим этилди

Япониянинг TVC стартапи бўйиннинг эрталабки қотиб қолиши ва оғриши муаммосини ҳал қилишга мўлжалланган ноёб ёстиқ - Mirukuru Pillow’ни тақдим этди. Янгилик олтита ички ҳаво камералари билан жиҳозланган бўлиб, улар тун давомида аста-секин шишади ва дами чиқади. Бу эса ухлаётган кишининг бошини билинар-билинмас силжитади, натижада босим нуқталари ўзгаради ва мушакларда димланишнинг олди олинади.

Гаджет яратувчиси Юкихиро Такеноучи, Япониядаги энг йирик Rirakuru массаж салонлари тармоғи асосчиси, мижозларни кўп йиллик кузатувлардан сўнг ушбу янгилик ҳақида ўйлади. Унинг таъкидлашича, сифатли массаждан кейин ҳам одамлар эрталаб уйқу пайтида ҳаракатсизлик туфайли бош оғриғидан шикоят қилади.

Mirukuru Pillow фойдаланиш учун жуда осон: унинг мобил иловаси ёки мураккаб созламалари йўқ. Бутун бошқарув ташқи контроллерга чиқарилган бўлиб, уни тумбочка устига қўйиш мумкин, ёстиқнинг ўзи эса унга ингичка найча билан уланган. Тизимни ишга тушириш учун уйқу олдидан битта тугмани босиш кифоя.

Ишлаб чиқувчилар қулайликка алоҳида эътибор қаратишган. Пневматика жуда шовқинсиз ишлайди, шунинг учун ҳаво камераларининг ҳаракатлари на эгасини, на ёнида ухлаётган одамни уйғотмайди. Ёстиқнинг оғирлиги тахминан 4,2 кг бўлиб, бу унинг тўшакда барқарорлигини таъминлайди.

Лойиҳа аллақачон Kickstarter краудфандинг платформасида зарур маблағни тўплаган. Биринчи ёстиқлар шу йил ёзида етказиб берилади ва дастлабки харидорлар учун нарх 261 долларни (≈3,1 млн сўм) ташкил этади.