Евроиттифоқ Ўзбекистоннинг иккита корхонасига санкция киритди

Ўзбекистоннинг пахта целлюлозаси ишлаб чиқарувчи иккита компанияси: Фарғона кимё заводи ва Жиззахдаги Raw Materials Cellulose корхонаси Европа Иттифоқининг Россияга қарши 20-санкциялар пакетига киритилди.

Фото: REUTERS/Yves Herman

Бу икки корхона Россия ҳарбий саноати учун пахта целлюлозаси етказиб берганликда гумон қилинган.

Санкция изоҳида келтирилишича, Farg‘ona Kimyo Zavodi – Перм ва Қозондаги порох заводларини, Raw Materials Cellulose эса Тамбовдаги порох заводини хомашё билан таъминлаган.

Бу корхоналарга Европа Иттифоқи субъектлари томонидан маблағ ва иқтисодий ресурслар ажратиш тақиқланган. ЕИ юрисдикциясида активлари бўлган тақдирда, улар музлатилади.

Ушбу икки корхона, шунингдек, “Mercury Renaissance” МЧЖга ўтган йили Украина ҳам санкция қўллаган эди.

Фарғона кимё заводи – 2012 йилда ташкил этилган. Таъсисчиси – Mercury Renaissance. Бу корхонага 2023 йилда Рустам Раҳимжонович Мўминов (60%) ва Глухов Михаил Александрович (40%) эгалик қилган, кейинроқ Глуховнинг улуши Шаҳриёр Сахиёрович Тожиевга, Мўминовнинг улуши эса Ольга Юрьевна Шагиевага ўтган.

Шаҳриёр Тожиев 2022 йилда тугатилган Qwerty Up'да улушдор бўлган. Ольга Шагиева эса Aloqainvest, Breegs, Atrium Tashkent, Geo Profi Mombasa Finance, Aloqa Klimkontrol, Visata Group, Fortress Invest, Pod Klyuch, Professional Legion ва бошқа фирмаларда ҳам улушларга эга.

Raw Materials Cellulose – 2017 йилда Жиззах шаҳрида рўйхатга олинган. 2024 йил январ ҳолатига, корхона ягона таъсисчи Лариса Михайловна Уткина эгалигида бўлган. Кейинроқ унинг улуши 76 фоизгача қисқариб, Лариса Раҳимжонова Бикова 24 фоизлик улушдорга айланган. Бугунги кунда таъсисчилар таркиби қуйидагича: Лариса Раҳимжоновна Бикова (25,1%), Бобур Лутфуллаевич Қобулниёзов (24,97%), Азамжон Нуриллаевич Валихонов (24,97%), Маъмуржон Маҳмуджон ўғли Алимов (24,96%).

Лариса Бикова – Aloqa Klimkontrol ва Vinder Invest'да, Маҳмуджон Алимов – Velcor ва Voltria'да, Бобур Қобулниёзов – Business Standart, Complex Technical Centre Asia ва Fiber Expo компанияларида ҳиссадорлар қаторида туради.

Азамжон Валихонов эса Чирчиқ трансформатор заводи, “Ўзбеккимёмаш” заводи, Қуйтош кони, Universal Rent Tashkent, Maxwell Service, Glory Project, Fiber Expo ва бошқа корхоналарда улушдор сифатида кўрсатилган.