АҚШда 60 метр баландликдан йиқилган аёл тирик қолди

Руҳий касалликка чалинган ва оғир жароҳат оқибатларидан азият чекаётган аёл уйидан чиқиб кетган ва қайтмаган. Қутқарувчилар ёрдам сўраб қичқираётган аёлни жарлик тубидан топишган. У шифохонага ётқизилган ва аҳволи барқарор деб баҳоланмоқда.

АҚШда баландлиги 60 метр бўлган жарликдан қулаган 49 ёшли аёл тирик қолди, деб хабар берди ABC7.

Хабарда айтилишича, ҳодиса Калифорния штатидаги Ранчо-Кукамонгада содир бўлган. Руҳий касалликка чалинган ва оғир жароҳат оқибатларидан азият чекаётган аёл уйидан чиқиб кетган ва қайтиб келмаган.

Оиласи унинг йўқолгани ҳақида полицияга хабар бергач, қидирув гуруҳи ташкил этилган. Қидирув ишларига изқувар итлар ҳам жалб этилган.

Нотекис йўлда ярим километр юриб жарлик томон бурилган қутқарувчилар аёлнинг ёрдам сўраб қичқирганини эшитишган.

Маълум бўлишича, аёл тик жарликдан қулаган бўлиб, жарлик баландлиги қарийб 60 метрни ташкил этган.

Оғир жароҳатларга қарамасдан, аёл тирик қолган. У вертолёт ёрдамида эвакуация қилинган ва шифохонага ётқизилган. Аёлнинг аҳволи барқарор деб баҳоланмоқда.