Исроил БААда «Темир гумбаз» тизими ва ўз ҳарбийларини жойлаштирган – ОАВ

Ушбу қарорни БАА президенти Муҳаммад бин Зайд Ол Ноҳайён билан телефон орқали мулоқот қилган Бинямин Нетаняхунинг шахсан ўзи қабул қилган. Қайд этилишича, БАА Исроил «Темир гумбаз» батареясини жўнатган илк хорижий давлатга айланган.

Фото: Alex Wong/Getty Images

Исроил Бирлашган Араб Амирликларига ўзининг «Темир гумбаз» ҳаво ҳужумидан мудофаа тизимини ҳамда уни бошқариш учун ҳарбийларини жўнатган, деб хабар берди Axios нашри.

Нашр манбларидан бирининг сўзларига кўра, ушбу қарорни БАА президенти Муҳаммад бин Зайд Ол Ноҳайён билан телефон орқали мулоқот қилган Бинямин Нетаняхунинг шахсан ўзи қабул қилган. Бу Эрон билан уруш бошланганидан кўп вақт ўтмай юз берган.

Нашрнинг қайд этишича, БАА Исроил «Темир гумбаз» батареясини жўнатган илк хорижий давлатга айланган.

«Биз буни ҳеч қачон унутмаймиз. Бу асл дўстимиз ким эканлигини кўрсатган ҳақиқий кашфиёт бўлди», дея амирлик мулозимининг сўзларидан иқтибос келтирган нашр.

БАА мудофаа вазирлиги ахборотига кўра, АҚШ ва Исроил Эронга зарба беришни бошланганидан буён эронликлар амирларга қарата 550га яқин баллистик ва қанотли ракеталар ҳамда 2200дан ортиқ дрон йўллаган.