Трамп суиқасддан омон чиқди, яна!

Азизлар, Доналд Трампни ўлдирмоқчи бўлишди, яна! 45 йил аввал худди шу меҳмонхона атрофида президент Рейганни ўлдирмоқчи бўлишганди. Жиноятчи бу ишни қилиши олдидан қариндошларига юборган хабаридан маълум бўладики, унинг нишони, шубҳасиз, Доналд Трамп бўлган. Америка президенти дунёда энг қаттиқ қўриқланадиган одам ҳисобланади, лекин барибир ниманидир ҳисобга олишмаган бўлади-да, кечагига ўхшаган бадкирдорлар жамиятда қўрқув уйғотиш учун Америка президентига суиқасд қилишга уринади.

Қўрқув

Видеони кўрган бўлсангиз, жиноятчи жуда тез ҳаракат қилган. У қуролни қўлига ушлаган кўйи қўриқчилар олдидан катта тезликда ўтиб кетишга уринган, лекин қўлга тушган. Кадрда қўриқчилар ўзаро гаплашиб ўтиргандек таассурот уйғонади. 31 ёшли Коул Томас Алленда ичкарига кириш учун ягона чора тезкор ҳаракат қилиш эди, чунки у ёлғиз ҳаракат қилган.

Катта эҳтимол ичкарига кира олмаслигини билган Коул қўлидаги милтиқданми, тўппончаданми, бир неча марта ўқ узишга улгурган. Ичкарида қўрқув уйғотиш учун шунинг ўзи етарли эди. Махфий хизмат зобитлари жиноятчининг башарасини ерга теккизган кўйи қўлига кишан урган бир вақтда меҳмонхона ичкарисида яхшигина саросима юзага келганди.

Айтганча, отишма Вашингтондаги Hilton меҳмонхонасида содир этилди. У ерда Доналд Трамп журналистлар билан тантанали кечки овқатда иштирок этаётганди. Ичкарида журналистлар, фотографлар жуда кўп эди, шу учун кадрдан муаммо йўқ. Энг кўп тарқалган кадрда Махфий хизмат зобитлари вице-президент Жей Ди Вэнсни эвакуация қилаётгани кўринади. Улар худди ёш болани тортгандай Вэнсни тортиб ташқарига олиб чиқиб кетишган.

Доналд Трамп эса ўқ овозини эшитганидан кейин ҳам ўзини жуда хотиржам тутди, ўзининг айтишича, аввалига бу шунчаки патнис тушиб кетганининг овози деб ўйлаган экан. Махфий хизмат зобитлари ўз танаси билан президентни тўсиб тургач, уни тезда хавфсиз ерга олиб кетишади.

Суиқасдга уринишдан кейин содир бўлган бир нарсага қойил қолиш керак. Доналд Трамп у билан кечки овқатда бўлган журналистларни тезда Оқ уйга чақириб, матбуот анжумани ўтказди. Бу борада Трампга доим қойил қолганман, исталган муҳим воқеа ҳақида биринчи бўлиб ўзи маълумот беради. Миш-миш, уйдирма кўпаймаслигининг энг тўғри йўли мана шу ўзи ­­­­­– сен ҳақингдаги воқеа тўғрисида биринчи бўлиб гапириш. Агар Трамп бир-икки кун кўринмай кетганида уни қўрққан деб ўйлашлари мумкин эди. Жиноятчи аслида шуни, Трамп орқали унинг тарафдорларини қўрқитишни истаган.

Дарвоқе, жиноятчи ҳақида аллақачон бир дунё фейк маълумотлар чиқди: уни гўёки собиқ ЦАҲАЛ аскари дейишди, ишдан Исроил изини излашди, турли хил мотивлар ўйлаб топишди. Менимча, бу ишда ҳеч қанақа мотив йўқ. Шунчаки бир америкалик ахмоқ машҳур бўлиш учун президент қатнашаётган тадбирга қурол билан бостириб кирди. Мана, бугун бутун дунё у ҳақда гапирмоқда. Америкада бунақа руҳий касаллар жуда кўп. Бири машҳур бўламан деб Кеннедини ўлдиради, бири снайпер билан Трампни отади, бошқаси Рейганни ўлдирмоқчи бўлади. Қотиллик орқали машҳур бўлишга интилиш Америка жамиятидаги касаллик.

Ахмоқ жиноятчи ўқитувчи экан. Суиқасдга жазм қилгач, қариндошларига бу ишни «Трампнинг сиёсатидан норози экани учун» қилаётганини айтибди. Тўғриси, унинг ўша хати ўқиб чиқишга ҳам арзимайди, унда ҳеч қанақа сиёсий мақсад бўлмаган деб ўйлайман. Ягона мақсад ­­– машҳур бўлиш, википедияда у ҳақида катта саҳифа очилиши ва сарлавҳаларда номи чиқиши, бўлди! Айнан шундай эканига умуман шубҳа қилмайман. Бир сиёсий раҳбарга норозилик билдирмоқчимисан, марҳамат, сайловда унга овоз берма, бунақа қилиб бутун жамиятда қўрқув уйғотадиган ишни қилиш руҳий касал, фақат ўзини ва машҳурликни ўйлайдиган нокасларга хос.

Трампнинг омади келди

Америка президентларига суиқасд қилиниши янгилик эмас, лекин Трамп каби кўп суиқасдлардан эсон-омон чиққан президент бўлмаса керак. Олдинги сафар ўқ қулоғини силаб ўтганди, бу гал жиноятчи ичкарига ҳам кира олмади. Ва барча ҳолатларда суиқасд Трампнинг обрўсини оширишга хизмат қилди холос. Ўзи сиёсий суиқасд шунақа, омадинг келмаса, ёмон тугайди, омадинг келиб тирик қолсанг, сен қаҳрамонсан!