Инфантино жонли эфирда Исроил ва Фаластинни яраштиришга уринди

29 апрел куни Канаданинг Ванкувер шаҳрида бўлиб ўтган ФИФА конгрессида кичик дипломатик можаро рўй берди. Ташкилот президенти Жанни Инфантино тинчликпарвар вазифасини бажаришга қарор қилиб, саҳнага Исроил ва Фаластин футбол федерациялари вакилларини чақирди ва уларни биргаликда суратга тушишга ҳамда бир-бирига қўл беришга ундади. Аммо бу уриниш муваффақиятсизликка учради.

«Биз азоб чекяпмиз»

Можаро делегатларнинг чиқишлари якунланганидан кейин, Инфантино Исроил футбол ассоциацияси вице-президенти Басим Шайх Сулаймон ҳамда Фаластин футбол ассоциацияси раҳбари Жабройил Ражубни саҳнага чиқишга чақирганида рўй берди.

Сулаймон бунга рози бўлган, Ражуб эса эътироз билдирган ва Инфантино билан кескин муҳокамага киришган. ФИФА президенти бир неча бор томонларни келиштиришга уринган. У Жабройилнинг қўлидан ушлаб олган ва уни кўндиришга уринган, аммо мақсадига эриша олмаган – фаластинлик расмий исроиллик ҳамкасбига қўл беришдан бош тортиб, шундай деган: «Биз азоб чекяпмиз». Якунда «тинчликпарвар» уларни навбатма-навбат қучиб қўйган, шундан кейин улар саҳнани тарк этишган. Инфантинонинг ўзи минбарга қайтиб, халқаро болалар турнири ўтказилиши ҳақида эълон қилган.

«Бир хил ҳуқуқ ва мажбуриятларга эга бўлган ҳамда ФИФА аъзоси ҳисобланган Исроил ва Фаластиннинг икки вакилига миннатдорчилик билдиришга ижозат бергайсиз. Биз биргаликда ишлаймиз, келинг, болаларга умид бериш учун шундай қилайлик... Тез орада 15 ёшгача бўлган футболчилар ўртасида ажойиб турнир ўтказамиз, унга барча 211 мамлакатни таклиф қиламиз. Келинг, болалар учун биргаликда ҳаракат қилайлик», – деган футбол мулозими.

Кейинроқ Ражуб журналистларга интервю чоғида ўз позицияси юзасидан изоҳ берди: «Мен учун спорт бу спорт. Ва бу мен ҳурмат қилишим керак бўлган ахлоқ кодекси. Аммо агар иккинчи томон Исроил бош вазири Бинямин Нетаняҳудек жиноятчининг вакили бўлса ва моҳиятан ФИФА конгрессида унинг номидан гапирса… Мен бундай одам билан қандай қилиб биргаликда суратга тушишим ёки унга қўл беришим мумкин?»

Бундан ташқари, Ражуб фаластинликлар Исроил клубларига нисбатан санкция қўлланишига эришмоқчи эканини қўшимча қилган: «Бангкокдаги 74-конгрессда биз яна бир бор ФИФАга Исроил футбол ассоциациясига аъзо бўлган, аммо Фаластин ҳудудида жойлашган клубларнинг Фаластин футбол ассоциацияси розилигисиз иштирок этиши масаласини кўриб чиқишни сўраб мурожаат қилдик. Шунингдек, биз ФИФАдан Исроил футболи тузилмасида давом этаётган камситиш ва ирқчиликка қарши курашиш чораларини кўришни сўрадик».

Сулаймон эса бўлиб ўтган ҳодиса юзасидан муносабат билдирмаган. Аммо ўз чиқишида биргаликда тотув яшашга чақириб, Исроил федерацияси «Фаластин футбол ассоциациясига қўл бераётгани»ни таъкидлаган.