Си Жинпинг ўз генералларига ишонмай қўйди – ОАВ

Хитойда юқори мартабали адмирал ва генераллар сони уч йил ичида 30 нафардан етти нафаргача камайди. Қайд этилишича, Си армияни модернизация қилиш учун ўзи танлаган қўмондонлар бундан буён ишончга муносиб эмас деган хулосага келган.

Фото: Getty Images

Хитой раиси Си Жинпинг ўзи тайинлаган генералларига нисбатан ишончини йўқотди, деб ёзмоқда The New York Times таҳлилчиларга таяниб. Газетанинг қайд этишича, ҳарбийларнинг бўшатилиши Хитой армияси модернизациясини хавф остига қўяди.

«Си Жинпинг бошқаруви изчил равишда якуний босқичга кирмоқда. Бу босқичда унинг сиёсий ҳисоб-китоблари ўзгармоқда ва у борган сари атрофидаги аъзолардан хавотирланмоқда», — деди Тайвандаги Чэнчи миллий университети профессори Цзян-вэн Коу.

NYT нашрининг ёзишича, янги кампания кадрлар алмашуви билан чекланиб қолмаяпти. Хитойда «мафкуравий тузалиш» ва «инқилобий тарбиялаш» дастури ишга тушган. Бундан мақсад офицерларнинг компартия ва раис Сига садоқатини мустаҳкамлашдир.

Қайд этилишича, Си армияни модернизация қилиш учун ўзи танлаган қўмондонлар бундан буён ишончга муносиб эмас деган хулосага келган. Ишонсизликнинг сабабларидан бири — коррупция.

Вашингтондаги мудофаа миллий университети катта илмий ходими Жоэл Вутнау Хитой етакчиси коррупция ва мафкуравий нопоклик орасида параллел ўтказмоқда деган тахминни илгари сурди.

«Сининг тасаввурида коррупция сабабли жанговар тайёргарликда юзага келаётган муаммолар мафкуравий нопоклик оқибати ҳисобланади», — деди у.

Шу йил февралида The New York Times АҚШ разведкасига таяниб охирги йилларда Си Жинпингда васваса аломатлари кузатилаётганини ёзганди. Газета манбалари Хитой армияси олий қўмондонлигидаги тозалашларни шу билан изоҳлаган.

Мамлакатда 2023 йилдан бери юқори мартабали адмирал ва генераллар сони 30 нафардан 7 нафаргача камайди. Марказий ҳарбий кенгаш раиси ўринбосари Чжан Юсянинг ҳибсга олиниши тозаловнинг охирги эпизоди бўлди.

The Wall Street Journal ўз манбаларига таяниб у жумладан, Хитой ядровий қуроли ҳақидаги муҳим техник маълумотларни АҚШга берганликда гумон қилинганини ёзди. Синхуа агентлиги эса “интизом ва қонун жиддий тарзда бузилгани” бўйича суриштирув бошланганини маълум қилди.

7 май куни Хитойнинг собиқ мудофаа вазирлари Вэй Фэнҳэ ва Ли Шангфу ҳукм ижросини икки йилга кечиктирган ҳолда ўлим жазосига ҳукм қилингани хабар қилинди. Давлат нашрларига кўра, Вэй ва Ли коррупцияда айбланган.