ЕИ исроиллик кўчманчиларга қарши янги санкцияларни келишиб олди

Европа Иттифоқига аъзо давлатлар ташқи ишлар вазирлари Иордан дарёсининг Ғарбий соҳилидаги исроиллик кўчманчиларга қарши янги санкцияларни келишиб олди. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Кая Каллас маълум қилди.

Фото: AFP

У X ижтимоий тармоғидаги саҳифасида ЕИ ташқи ишлар вазирлари “фаластинликларга қарши зўравонликлар муносабати билан исроиллик кўчманчиларга қарши санкцияларни маъқуллаганини” ёзган.

Калласнинг қўшимча қилишича, Европа Иттифоқи шунингдек, ҲАМАС ҳаракати етакчиларига қарши ҳам янги санкцияларни келишиб олган. Бироқ у аниқ шахслар номини очиқламаган.

11 май куни Франция ташқи ишлар вазири Жан-Ноэль Барро ҳам ижтимоий тармоқларда Европа Иттифоқи Ғарбий соҳилдаги “экстремистик ва зўравон колонизацияни қўллаб-қувватлаётган асосий исроиллик ташкилотлар ҳамда уларнинг раҳбарларига қарши санкциялар киритаётгани”ни билдирган.

Унинг таъкидлашича, “бундай ўта жиддий ҳаракатлар зудлик билан тўхтатилиши керак”.

Барро ҲАМАСни “террорчилик ҳаракати” деб атаб, уни тўлиқ қуролсизлантириш ва Фаластин ҳудудлари келажагини белгилаш жараёнидан четлаштириш лозимлигини айтган.

ЕИнинг янги санкцияларни келишиб олишига Венгриянинг позициясини ўзгартириши сабаб бўлган. Аввалроқ Будапешт ушбу чораларни бир неча ой давомида блоклаб келаётган эди.

Жаҳон агентликлари маълумотига кўра, янги санкциялар уч нафар исроиллик кўчманчи ва тўртта кўчманчилар ташкилотига нисбатан қўлланади. Аммо уларнинг номлари ҳозирча ошкор этилмаган.

2024 йилда Европа Иттифоқи Ғарбий соҳилда фаластинликларга қарши зўравонликларда айбланган тўрт нафар шахс ва икки компанияга нисбатан санкциялар жорий қилган эди. Ушбу чоралар виза чекловлари ва активларни музлатишни назарда тутган.

11 май куни қабул қилинган қарор санкцияларни расман жорий этиш бўйича ҳуқуқий жараённи бошлаб берган. Чеклов чоралари кейинроқ кучга кириши кутилмоқда.

Исроил бош вазири Биньямин Нетаньяҳу Европа Иттифоқининг бу қарорини қаттиқ танқид қилиб, уни “маънавий банкротлик” деб атаган.

Унинг фикрича, Европа Иттифоқи “исроиллик фуқаролар ва ҲАМАС террористлари ўртасида сохта тенглик яратган”.

Аввалроқ Исроил ташқи ишлар вазири Гидеон Саар ҳам ЕИ санкцияларини “ўзбошимчалик” деб баҳолаган.

Маълумот учун, Исроил 1967 йилги Олти кунлик урушдан сўнг Иордан дарёсининг Ғарбий соҳили устидан назорат ўрнатган. Халқаро ҳуқуққа кўра, ушбу ҳудудларда яҳудий посёлкаларини қуриш ноқонуний ҳисобланади.

2024 йил 19 июль куни БМТ Халқаро суди мазкур посёлкалар халқаро ҳуқуқни бузишини тан олган.

Ҳозирги вақтда Ғарбий соҳилда тахминан 500 минг яҳудий ва 3 миллионга яқин фаластинлик яшайди.

Яқин Шарқдаги вазият 2023 йил 7 октябрда ҲАМАСнинг Исроилга йирик ҳужум уюштириши ортидан кескинлашган эди. Ўшанда қарийб 1200 киши ҳалок бўлган, 250 га яқин одам гаровга олиб кетилган.

2025 йил октябрида Исроил ва ҲАМАС АҚШ президенти Дональд Трамп маъмурияти ишлаб чиққан тинчлик режаси доирасида ўт очишни тўхтатишга рози бўлган.

2026 йил январь ойида Оқ уй Ғазо секторидаги урушни тугатиш режасининг иккинчи босқичи бошланганини маълум қилган.

https://www.dw.com/ru/es-soglasoval-novye-sankcii-protiv-izrailskih-poselencev-na-zapadnom-beregu/a-77126103