Трамп: Пекин Эронга қурол етказмасликка ваъда берди

АҚШ президенти Дональд Трамп Хитой Америкадан нефть ва соя маҳсулотларини сотиб олишга қизиқиш билдирганини маълум қилди. Бу ҳақда у Пекинда Хитой раиси Си Жинпинг билан икки соатлик музокаралардан кейин Fox News телеканалига берган интервьюсида айтди.

Фото: picture alliance

Маълум қилинишича, Хитой илгари ҳам АҚШ нефтини маълум ҳажмда импорт қилган. Бироқ Трамп 2025 йилда Хитойга қарши “савдо уруши”ни бошлаганидан кейин бу харидлар кескин камайган. Шунингдек, Пекин Америка сояси ўрнига асосан Бразилиядан етказиб берилаётган маҳсулотларга ўтган.

Трамп интервью давомида Си Жинпинг Эронга таъсир ўтказиши мумкинлигига ҳам умид билдирган. Унинг сўзларига кўра, Хитой раҳбари Пекин АҚШ ва Исроилнинг Эрон билан урушини тўхтатиш бўйича музокараларга ёрдам беришни ҳамда Ҳўрмуз бўғозида кемалар қатновини қайта тиклашни истаётганини айтган.

Шу билан бирга, Трамп Си Жинпинг Эронга қурол етказиб берилмаслигига ваъда берганини ҳам таъкидлади.

АҚШ президенти Эрон билан муносабатлар ҳақида гапирар экан, Вашингтон бундан буён Теҳронга нисбатан сабр қилмаслигини билдирди. Унинг фикрича, Эрон АҚШ билан келишувга эришиши керак.

Трамп Эрон тўплаган бойитилган уран масаласига ҳам тўхталиб, уни “кўмиб ташлаш мумкинлиги”, аммо ўзи бу уранни “назоратга олишни афзал кўриши”ни айтди.

Шунингдек, у ҳозирги Эрон раҳбариятини “ақлли инсонлар” деб атаб, АҚШ улар билан музокаралар олиб бораётганини маълум қилди.