Тошкент аэропортида қарийб 1 кг синтетик наркотик ушлаб қолинди

Тошкент халқаро аэропортида Давлат хавфсизлик хизмати ва божхона ходимлари томонидан ўтказилган тезкор тадбирда қарийб 1 килограмм “Алфа-ПВП” синтетик наркотик моддасини мамлакатга олиб киришга уриниш бартараф этилди.

Фото: Божхона қўмитаси

Маълум қилинишича, хориждан учиб келган Фарғона вилоятида яшовчи 1988 йилда туғилган шахс ҳамда 2006 йилда туғилган Россия Федерацияси фуқаросининг қўл юклари ва багажлари божхона назоратидан ўтказилган.

Текширув жараёнида спорт озуқаси ниқоби остида қадоқланган икки елим идиш ичида жами 986 грамм “Алфа-ПВП” синтетик наркотик моддаси борлиги аниқланган. Модданинг бир қисми 500 грамм, иккинчи қисми эса 486 граммни ташкил этган.

Шундан сўнг тезкор тадбир давом эттирилиб, Сергели туманидаги хуфия жойга қолдирилган гиёҳвандлик воситасини қабул қилиб олиш вақтида унинг буюртмачиси бўлган 1996 йилда туғилган пойтахтлик шахс ашёвий далиллар билан ушланган.

Ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.

Мутасаддилар фуқароларни гиёҳвандлик воситалари савдоси билан боғлиқ ҳолатлар ҳақида ДХХнинг 1520 қисқа рақами орқали хабар беришга чақирган. Шахс сир сақланиши кафолатланиши таъкидланган.