Қўшимча функционаллар
-
Тунги кўриниш
Зангиотада йирик кумуш савдосига чек қўйилди
Тошкент вилоятининг Зангиота туманида ўтказилган тезкор тадбир давомида 10 килограммдан ортиқ кумушни ноқонуний сотишга уринган шахс қўлга олинди. Тадбир чоғида миллиардлаб сўмлик қимматбаҳо металллар ҳам аниқланди.
Давлат хавфсизлик хизмати, Иқтисодий жиноятларга қарши курашиш департаменти ҳамда Божхона органлари ҳамкорлигида ўтказилган тезкор тадбирда қимматбаҳо металлларнинг ноқонуний муомалага киритилишига чек қўйилди.
Маълум бўлишича, Тошкент шаҳрида яшовчи 1992 йилда туғилган шахс 13 дона қуйма бўлаклардан иборат бўлган, жами 10 килограмм 35 грамм кумушни махсус харидорга 20,8 минг АҚШ долларига сотаётган вақтида ашёвий далиллар билан ушланган.
Мутахассислар хулосасига кўра, мазкур кумушнинг умумий қиймати 235 миллион 229 минг сўмни ташкил этади.
Терговга қадар текширувлар давомида гумонланувчи заргарлик буюмлари ишлаб чиқариш билан шуғулланувчи масъулияти чекланган жамият ходими экани аниқланган. Шунингдек, ушбу корхонада олтин ва кумуш маҳсулотларига қайта ишлов берилгани, бироқ аффинаж фаолияти билан шуғулланиш учун тегишли рухсатномага эга эмаслиги маълум бўлган.
Тезкор тадбир давомида мазкур манзилдан умумий қиймати 3 миллиард 483 миллион сўмлик 58 килограмм кумуш ҳамда 2,2 килограмм олтин борлиги аниқланган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
