Кубанинг энергетика соҳаси АҚШ санкциялари нишонига айланди

АҚШ ҳукумати Кубанинг давлатга қарашли нефт-газ компанияси — CUPET (Union Cuba Petroleo)га қарши янги санкциялар жорий қилди. Вашингтон бу қарорни Ҳаванага нисбатан сиёсий ва иқтисодий босимни янада кучайтириш йўлидаги навбатдаги қадам сифатида баҳоламоқда.

Фото: AP

АҚШ давлат котиби Марко Рубио 11 июн куни мазкур чоралар ҳақида маълум қилди. Унинг таъкидлашича, Куба ҳукумати энергетика соҳасидан аҳоли устидан назорат ўрнатиш ва ўз манфаатларини таъминлаш воситаси сифатида фойдаланмоқда.

Янги қарорга мувофиқ, CUPET компанияси АҚШнинг махсус санкциялар рўйхатига киритилди. Энди АҚШ фуқаролари ва компанияларига мазкур ташкилот билан ҳар қандай тижорат муносабатларини ўрнатиш тақиқланади.

Америка Молия вазирлиги маълумотига кўра, CUPET билан ҳамкорлик қилувчи хорижий шахслар ва ташкилотлар ҳам иккиламчи санкциялар хавфига дуч келиши мумкин.

Вашингтон босимни давом эттирмоқчи

Марко Рубионинг билдиришича, Куба халқи кўпроқ иқтисодий ва сиёсий эркинликларга эришмагунича АҚШ коммунистик режимнинг энергетика савдосидан фойдаланиш имкониятларини чеклаш сиёсатида давом этади.

У Вашингтон Куба раҳбариятининг коррупциявий манфаатлари ва аҳолига нисбатан босим сиёсатига қарши курашиш учун иқтисодий чораларни кучайтиришини таъкидлади.

Бир ҳафта аввал Куба раҳбариятига қарши ҳам санкциялар киритилган эди

Бу АҚШнинг сўнгги кунларда Кубага қарши қабул қилган биринчи чеклови эмас.

4 июн куни Вашингтон Куба президенти Мигел Диас-Канел ҳамда собиқ раҳбар Раул Кастронинг бир қатор яқин қариндошларига қарши иқтисодий санкциялар жорий қилган эди.

Янги чекловлар президентнинг турмуш ўртоғи ва ўгай ўғлига, шунингдек Раул Кастронинг фарзандлари ва набираларидан айримларига ҳам татбиқ этилди.

95 ёшли Раул Кастро расман давлат лавозимларини эгалламаса-да, мамлакат сиёсий ҳаётида муҳим таъсирга эга шахс сифатида қаралади.

Кубада иқтисодий инқироз чуқурлашмоқда

Сўнгги ойларда АҚШ ва Куба ўртасидаги муносабатлар янада кескинлашди. Куба расмийлари Вашингтонни орол давлатига қарши босим ва таҳдидларни кучайтиришда айбламоқда.

1962 йилдан бери АҚШ иқтисодий эмбаргоси остида яшаб келаётган Куба ҳозирда СССР парчаланганидан кейинги энг оғир иқтисодий инқирозлардан бирини бошдан кечирмоқда. Мамлакатда электр энергияси узилишлари, ёнилғи танқислиги ва иқтисодий қийинчиликлар кучайган.

Вазиятга Венесуэладан нефт етказиб бериш ҳажмининг қисқариши ҳам таъсир қилган. Илгари Кубанинг асосий энергетик ҳамкори ҳисобланган Каракас билан алоқалар заифлашиши оролдаги энергетик муаммоларни янада кучайтирган.

Таҳлилчилар фикрича, янги санкциялар Куба иқтисодиётига қўшимча босим ўтказиши ва мамлакатнинг ёнилғи таъминоти билан боғлиқ муаммоларини янада оғирлаштириши мумкин.