Лондон шимолида икки поезд тўқнашди

Буюк Британия пойтахти Лондон шаҳридан тахминан 100 километр шимолда икки поезд тўқнашиб кетиши оқибатида машинист ҳалок бўлган ва 89 киши жароҳат олган. Жароҳатланганлардан 11 нафари жуда оғир аҳволдалиги, яна 22 кишининг ҳам жароҳати жиддийлиги маълум қилинган.

Steve Hubbard/BBC

19 июн куни куни соат 17:15 атрофида Бедфорд шаҳридан жанубдаги линияга фавқулодда хизматлар ходимлари чақирилган. Бу ерда East Midlands Railway компаниясига тегишли бўлган икки поезд тўқнашиб кетган. Уларнинг иккиси ҳам олдинма кетин Лондондаги Сент-Панкрас вокзали томон келаётган бўлган.

Тармоқларда тарқалган видеоларда бир поезд тумшуғи ўзидан олдиндагисининг орқа қисмига қадалиб қолганини кўриш мумкин. Вагонлардан камида биттаси издан чиқиб кетган.

Ҳодиса оқибатида поездлардан бирининг машинисти воқеа жойида ҳалок бўлган, 89 киши жароҳат олган: шундан 11 киши жуда оғир, 22 киши оғир аҳволда, 56 кишининг жароҳати енгил деб баҳоланмоқда.

Буюк Британия бош вазири Кир Стармер ҳалок бўлган машинистнинг оила аъзоларига ҳамдардлик билдирди ва бошқа жабрланувчиларга тезроқ соғайиб кетишни тилади.

Воқеа жойига 20 дан ортиқ тез ёрдам машиналари ва олтита тез ёрдам вертолёти жалб этилган.

Расмийлар воқеа тафсилотларини ўрганмоқда.

East Midlands Railway компанияси поездларининг Сент-Панкрас вокзалига ва ортга ҳаракати кун охиригача тўхтатилган. Шанба куни ҳам поездлар ҳаракатида узилишлар кузатилган.