Украина Қримни материк билан боғловчи кўприклардан бирини вайрон қилди

Украиналик ҳарбийлар Қримни Херсон областининг РФ назоратидаги қисми билан боғловчи Шимолий Қрим канали орқали ўтган темирйўл кўприги бутунлай яксон этилганини маълум қилди.

Украина махсус операциялар кучлари кўприкка зарба берилиши акс этган видеони эълон қилди. Кўприк вайрон қилингани мустақил манбалар орқали тасдиқланмаган, РФ расмийлари эса украинлар баёнотига муносабат билдирмаган. Вайрон қилинган кўприк Қримни материк билан боғловчи учта кўприкдан бири ҳисобланарди.

Украина қуролли кучлари 23 июнга ўтар кечаси ҳам дронлар билан ёпирилма ҳужум уюштирган. Керчдаги иссиқлик электр станцияси ҳам ҳужум нишонларидан бири бўлган: станцияда кучли ёнғин чиққан, бу ерда кўтарилган тутун ўнлаб километр масофага чўзилган.

Ёнғин туфайли яриморолда электр таъминотида узилишлар бошланган – Евпатория, Саки, Жанкой, Красноперекопск бутунлай светсиз қолган. Яриморолнинг РФ томонидан тайинланган ҳукумати свет ўчишини «электр тармоқларидаги технологик бузилиш» билан изоҳлаган. Қримнинг айрим районларида электр якшанба кунидан буён график бўйича кунига фақат бир неча соатга берилмоқда – икки кун олдин ҳам Украина қуролли кучлари регионнинг электр таъминот тизимига ҳужум қилганди.

Сўнгги ҳафталарда Украина дронлар орқали «яқин фронторти» (фронт чизиғидан бир неча ўн километр масофадаги ҳудудлар) бўйлаб зарбалар беришни кучайтиргач, Қримдаги вазият маҳаллий аҳоли учун кескин ёмонлашди. Бу ҳудудда Қримни Херсон ва Донецк областларининг босиб олинган ҳудудлари орқали Россиянинг асосий қисми билан боғловчи трассалар жойлашган. Дронлар яриморолга турли маҳсулотлар, жумладан, бензин олиб келаётган юк машиналарга ҳужум қилмоқда.

Натижада Қримда ёқилғи тақчиллиги юзага келди ва ёқилғини талон бўйича сотиш жорий этилди, 21 июндан эса эса ёқилғи қуйиш шохобчаларида бензин сотиш бутунлай тўхтатилди – ёқилғи фақат давлат хизматлари машиналарига қуйиб берилиши мумкин.

23 июн куни маҳаллий расмийлар Қрим кўприги орқали енгил автомобилда 200 литргача ёқилғи олиб ўтишга рухсат берилишини маълум қилди. Бунгача максимал норма 100 литрни ташкил этарди – бундай чеклов Украина қуролли кучлари кўприк орқали ҳаракатланувчи транспорт воситаларига зарба бериши портлаш ҳамда кўприк шикастланишига олиб келиши бўйича хавотирлар туфайли киритилганди.

Расмийлар регионга келувчи сайёҳлар ҳам ёқилғини ўзи билан олиб келишини истамоқда. «Фонтанка» Россия туризм саноати иттифоқи вице-президенти Георгий Моховга таяниб ёзишича, Феодосия, Евпатория ва Ялтадаги меҳмонхоналар мижозларни канистрларда ёқилғи захирасига эга бўлиш ва уни хавфсиз сақлаш учун шароитларни таъминлаш зарурлиги ҳақида хабардор қилиш бўйича кўрсатма олган.

Украина мудофаа вазирлиги эса 22 июн куни кечқурунги баёнотида «Қримда пляж мавсуми ёпилиши»ни эълон қилиб, сўнгги кунларда яриморолда нефт базаси, газ компрессор станциялари, радиолокацион станциялар ҳамда ҳаво ҳужумидан мудофаа тизимлари ҳужумга учраганини эслатган. «Сайёҳлар учун прогноз ноқулай», – дейилган Украина ҳарбий идораси хабарида.

Украина ҳарбийлари ҳужумлар кучайтирилишини ваъда қилган. «Биз оператив чуқурликда пилотларимиз сонини кўпайтирамиз ва душман логистикасини янада фаоллик билан яксон этамиз. [...] Душман логистикасини шундай тўсиб қўямизки, уларга жуда қийин бўлади», – деган Миллий гвардия қўмондони Олександр Пивненко.

Қримдаги вазият ёмонлашуви фонида Украинанинг БМТдаги доимий вакили Ондрий Мелник Украина ҳарбий ҳаракатларни тугатиш бўйича ёндашувини қайта кўриб чиқиши мумкинлигини айтди. У БМТ Хавфсизлик Кенгашини фронт чизиғида зудлик билан ўт очишни тўхтатиш зарурлиги тўғрисида резолюция қабул қилишга чақирди ва Украина буни ҳозирданоқ ўз томонидан муроса сифатида кўриб чиқаётганини, яқин келажакда эса «ўз ёндашувларини ўзгартириш»га тайёрлигини таъкидлади.

«Сиз босиб олинган ерларни сақлаб қола олмайсиз. Ҳеч қачон. Украинадан имкон қадар тезроқ даф бўлинг», – деган у Россияга юзланиб.