«Бу мусобақа мен учун ҳам катта тажриба бўлди» – Каннаваро

Италиялик мутахассис футболчиларни биринчи бўлим учун мақтаган ва улар билан фахрланишини билдирган. Жамоа сардори Элдор Шомуродов эса ҳисобни сақлашга уриниш – мураббийнинг кўрсатмаси бўлмагани, одатда футболчиларнинг ўзи ҳам бундай ҳолатларда ҳисобдан келиб чиқиб ўйнаши, рақиб ҳам бунга мажбур қилганини айтиб ўтди.

Фото: ЎФА

Ўзбекистон миллий жамоаси бош мураббийи Фабио Каннаваро Конго ДР билан ўйиндан кейинги матбуот анжуманида иштирок этди.

Ўзбекистон жаҳон чемпионати гуруҳ босқичи 3-тури доирасида кечган ушбу ўйинда 1:3 ҳисобида мағлубиятга учради. Каннаваро шогирдлари ўйиннинг 10-дақиқасидаёқ Элдор Шомуродов урган гол эвазига ҳисобда олдинга чиқиб олганди, аммо иккинчи бўлимда ҳимояда йўл қўйилган хатолар туфайли учта гол ўтказиб юборилди – 1:3.

Италиялик мутахассис футболчилар ўйиндан олдин тўпсиз ўйнаш қийин бўлишини тушуниб турганини айтиб ўтди.

«Биринчи бўлимда жуда кўп энергия сарфладик. Бугунгача бизнинг жисмоний самарадорлигимиз яхши эди, бугун ҳам жисмоний томондан яхши ҳаракатландик. Рақибимиз ҳам бу томонлама яхши шаклланган жамоа эди. Биз ўйиндан олдин тўпни назорат қилмасак қийин бўлишини билардик. Иккинчи бўлимда хатолар қилдик ва шу сабабли голлар ўтказиб юбордик», – дея унинг сўзларини келтирмоқда ЎФА матбуот хизмати.

Каннаваро жамоа биринчи бўлимни жуда яхши бошлагани ва кўплаб имкониятларга эга бўлгани, иккинчи бўлимда эса хатоларга йўл қўйилганини таъкидлаган.

«Бу мусобақа мен учун ҳам, футболчилар учун ҳам катта тажриба бўлди. Ўйлайманки бу келажакда бизга катта мотивация беради.

Албатта, футболчилар билан жуда кўп мулоқот қилдим. Гуруҳимизда ҳам кучли жамоаларга қарши ўйнашимиз кераклигини билардик. Лекин ушбу натижадан афсусдамиз.

Ҳа, биз хатолар қилдик. Бироқ мен футболчилардан умуман шикоят қилмоқчи эмасман. Улар қўлидан келган ҳаммасини қилди ва мен улардан фахрланаман», – деган италиялик мутахассис.

Ўйиндан кейин жамоа ҳужумчиси ва ўйиндаги ягона гол муаллифи Элдор Шомуродов ҳам микст зонада «Ўзбекистон 24» учун интервю берган. У кичик ҳисобдаги устунликни ушлашга ҳаракат қилиш бош мураббийнинг кўрсатмаси бўлмаганини айтиб ўтган.

«Фабио Каннаваро эмас, бу кўпроқ психологик томонлама. Бу нарса футболчиларнинг хаёлида бўлди, деб ўйлайман. Чунки ҳар доим ғалаба қозонаётганингда, ўша ҳисобни ушлаш учун ҳаракат қиласан. Шунинг учун буни кўпроқ психологик омил деб ўйлайман. Албатта, иккинчи бўлимда ҳам, биринчи бўлимдагидек ўйнашда давом этишимиз керак эди.

Лекин шуни унутмаслик керакки, Конго ҳам жисмоний томондан анча кучли жамоалардан бири. Улар буни олдинги ўйинларда ҳам кўрсатишганди ва бугун уларга ғалаба керак эди. Кўпроқ ҳимояланишимизга улар ҳам мажбур қилди деб ўйлайман.

Агар шу ерда бўладиган бўлсак, албатта даражамиз шу бўлади. Агар ундан кўпроғига лойиқ бўлганимизда, албатта кўпроғига эришган бўлардик.

Лекин энг асосийси, қаерга ишлашимиз кераклигини, қаерга қараб ишлашимиз кераклигини жаҳон чемпионати кўрсатиб берди ва катта тажриба бўлди. Футболчилар ҳам борини бериб ўйнашди ҳаммаси.

Албатта, бу ерда осон ўйиннинг ўзи бўлмайди. Кичик хатолар ҳам кечирилмайди. Ўйлашимча, тажриба етишмаслиги эвазига мана шу жойимизда қолиб кетдик», – деган жамоа сардори.