Bugatti чинни қопламали ноёб автомобилни тақдим қилди

Франциянинг Bugatti компанияси ўз гиперкарининг эксклюзив версияси бўлган W16 Mistral Blanc Éternal’ни тақдим этди - у кузов тюнинги, қўл графикаси ва чинни қисмлар билан жиҳозланган.

Фото: Bugatti

Bugatti компанияси W16 Mistral родстерининг ноёб нусхасини тақдим этди. Автомобил Blanc Eternel номини олди ва Германиянинг Ko‘nigliche Porzellan-Manufaktur Berlin (KPM) компанияси билан ҳамкорликда ишлаб чиқилган ҳақиқий чинни билан ғайриоддий пардозлаш орқали ажралиб туради.

Чинни бутун кузов панеллари учун эмас, балки фақат алоҳида безак элементлари учун ишлатилган. Ушбу материалдан двигател қисмидаги қўшимчалар, мой қуйиш бўғзининг қопқоғи, ёнилғи бакининг қопқоғи ва эмблемалар, жумладан, двигателнинг чинни қопқоғидаги KPM логотипи тайёрланган.

Компания маълумотларига кўра, ушбу деталларни тайёрлаш мураккаб муҳандислик тайёргарлигини талаб қилган. Пишириш пайтида чинни тахминан 17 фоизга камаяди, шунинг учун барча элементлар дастлаб ишлов берилгандан сўнг лойиҳа ўлчамларига аниқ мос келиши учун катталаштирилган ўлчамда ишлаб чиқарилган.

Автомобилнинг кузови оқ рангга бўялган бўлиб, унинг устига кўплаб ингичка қора чизиқлардан иборат мураккаб расм қўлда чизилган.

Чинни салонда ҳам мавжуд. У узатмаларни алмаштириш ричаги, динамик устқуймалари, марказий тирсак тирагич, ойна кўтаргич клавишлари ва бошқа элементларни безашда ишлатилади.

Bugatti автомобили тақдимотида Bugatti ва KPM Blanc Eternel чинни идишларининг чекланган тўпламини эълон қилди. У To-Drive Cup ва Aviator Cup кубокларини ўз ичига олади. Тўпламнинг умумий адади 1000 нусхада қўлда ишланган.

Bugatti автомобилларида чиннидан фойдаланиш янги ғоя эмас. 2011 йилда бренд KPM билан биргаликда яратилган Veyron Grand Sport Vitesse L’Or Blanc махсус версиясини намойиш этган эди.

Blanc Eternel техник жиҳатдан стандарт W16 Mistral билан бир хил:

двигатель: 8,0 литрли W16 Quad-Turbo;
қуввати: 1600 от кучи (1578 от кучи);
буровчи лаҳза: 1600 Н·м;
юритма: тўлиқ;
узатмалар қутиси: 7 босқичли роботлаштирилган DSG;
0-100 км/соат тезланиш: тахминан 2,4 секунд;
максимал тезлик: 450 км/соатдан юқори (Mistral модели серияли родстерлар орасида жаҳон рекордини ўрнатган - 453,91 км/соат).

Бу автомобил нима учун ўзига хос?

Ягона нусхада чиқарилган.
Sur Mesure дастури доирасида қўлда яратилган.
Bugatti 2005 йилдан бери ишлатиб келаётган афсонавий W16 двигателига бағишланган сўнгги санъат асарларидан бири.
V16 атмосфера двигатели билан жиҳозланган гибрид Bugatti Tourbillon билан бренднинг янги даврга ўтишини англатади.

Автомобилнинг нархи расман эълон қилинмади, аммо асосий W16 Mistral нархи 5 миллион еврога баҳоланган, Blanc Eternel’нинг ноёб версияси эса анча қимматроқ бўлиши мумкин.