Ўзбекистонликлар хорижга инвестиция киритиши кескин кўпайди

Январ–март ойларида Ўзбекистон резидентлари хорижий активларга 153,1 млн доллар тўғридан тўғри инвестиция киритди. Бу – ўтган йилнинг мос давридаги кўрсаткич (4,7 млн доллар)дан 33 баробарга кўп. Мазкур тарихий ўсиш – Ўзбекистон резидентларига АҚШда инвестиция фаолиятини олиб бориш учун ҳукуматдан рухсат олиш тартиби 2026 йил 1 январдан бошлаб бекор қилиниши ортидан рўй бермоқда.

АҚШнинг Чикаго шаҳри / Фото: Kun.uz

2026 йил I чорагида Ўзбекистон резидентларининг хорижий активларга киритган тўғридан тўғри инвестициялари 153,1 млн долларни ташкил этди.

Таққослаш учун, 2024 ва 2025 йиллар I чорагида мазкур кўрсаткич мос равишда 3,5 млн ва 4,7 млн долларни ташкил этган.

Ушбу маълумот – Марказий банк эълон қилган тўлов баланси ҳисоботида келтириб ўтилган.

Қайд этилишича, биринчи чоракда норезидентларнинг Ўзбекистонга киритган тўғридан тўғри инвестициялари 702 млн долларни ташкил қилган. Бу – 2025 йилнинг мос давридаги 761,7 млн доллардан кам, аммо 2024 йилнинг биринчи чорагидаги 380,1 млн доллардан юқори.

Хорижга инвестиция эркинлигининг кенгайиши

Ўзбекистон президентининг 2025 йил 11 ноябрдаги “Америка-Ўзбекистон ишбилармонлик ва инвестиция кенгашини ташкил этиш тўғрисида”ги фармони ҳамда Ўзбекистон Марказий банкининг 16 декабр кунги қарори билан, 2026 йил 1 январдан бошлаб Ўзбекистон резидентлари учун АҚШда рўйхатга олинган компанияларга инвестиция киритишда ҳукумат рухсатини олиш талаби бекор қилинди.

Илгари 10 минг доллардан ортиқ қийматдаги инвестиция амалиётлари учун рухсатнома талаб қилинарди.

2026 йил 1 январдан бошлаб эса, Ўзбекистон резидентлари АҚШдаги инвестиция фаолияти бўйича қуйидаги имкониятларга эга бўлди:

компания ташкил этиш (устав капиталини шакллантириш), Америка компаниясидаги улуш ёки акцияларни сотиб олиш учун АҚШга пул ўтказиш;
маблағларни АҚШдаги ўз филиалларининг айланма капиталини тўлдиришга йўналтириш;
буни исталган миқдорда, ҳисобварақлардаги ўз маблағларидан келиб чиқиб амалга ошириш.

Мазкур эркинликлар фақат АҚШга инвестиция фаолиятига тааллуқли эди. Аммо Марказий банкнинг 2 июн кунги қарори билан, ўзбекистонликларнинг бошқа мамлакатларга инвестиция киритиш имкониятлари ҳам кенгайтирилди.

2026 йил 17 сентябрдан кучга кирадиган қарорга асосан, жисмоний шахслар бир календар йил давомида 10 000 АҚШ доллари эквивалентидан юқори бўлмаган суммада алоҳида рухсат олмаган ҳолда чет элда инвестиция фаолиятини амалга ошириши, яъни чет элдаги корхоналарнинг устав капиталини шакллантириш ёки улушли иштирок этиши (компания акциясини сотиб олиши) мумкин.

Шунингдек, давлат улуши мавжуд бўлмаган корхоналарга бир календар йил давомида 200 000 АҚШ доллари (давлат улуши мавжуд корхоналарга – 100 000 АҚШ доллари) эквивалентидан юқори бўлмаган суммада чет элда инвестиция фаолиятини амалга оширишига рухсат этилади. Гап – чет элдаги корхоналарнинг устав капиталини шакллантириш ёки улушли иштирок этиш, чет элда филиаллар, ваколатхоналар ва савдо уйлари фаолиятини ташкил этиш ҳақида кетмоқда.

Шунингдек, давлат улуши мавжуд бўлмаган корхоналар 100 000 АҚШ доллари (давлат улуши мавжуд корхоналар – 50 000 АҚШ доллари) эквивалентидан юқори бўлмаган суммада чет элдаги ўз филиаллари ва ваколатхоналарини айланма маблағлар билан тўлдириш ҳуқуқига эга бўлади.