Зеленский Путинни Константиновка бўйича ёлғон баёнот беришда айблади

Украина президенти Володимир Зеленский Россия томонининг рус ҳарбийлари Донецк областидаги Константиновка шаҳрини тўлиқ эгаллагани тўғрисидаги баёнотини «ёлғон» деб атади.

«Бу шунчаки қандайдир янгилик тарқатишни хоҳлаган Россиянинг навбатдаги ёлғони», – деган Зеленский. Унинг фикрича, Владимир Путин АҚШдаги Мустақиллик куни арафасида президент Доналд Трампга фронтдаги вазият ҳақида ёлғон маълумот етказишни истаган.

«Модомики, Константиновка ҳозир Россия назоратида экан, Путинда бу ерга келиб, мен билан учрашиш ва урушни ниҳоят якунлашда муаммо бўлмасди. Аммо у барибир чизиғини кесиб ўтмайди: ҳақиқат Путиннинг сўзларидан жиддий фарқланади», – дея қўшимча қилган Украина етакчиси.

3 июл куни кечқурун Кремл Россиядаги телеканаллар ва давлат ахборот агентликлари орқали Путин Россия бирлашган қўшинлар гуруҳи бошқарув пунктларидан бирига ташриф буюргани ҳақида маълумот тарқатди. У ерда ўтказилган йиғилишда Россия президентига РФ қуролли кучлари Константиновка шаҳрини тўлиқ эгаллагани ҳақида ҳисобот берилган.

Константиновка учун жанглар 2025 йил октябридан буён давом этмоқда. Сўнгги ҳафталарда россиялик штурмчилар шаҳарнинг барча районларида кўриниш берган, аммо унинг чеккаларида Украина қуролли кучлари позициялари ҳам сақланиб қолган. 

«Агентство» нашри қайд этишича, Путиннинг 3 июл куни ҳарбийлар олдига келиши – сўнгги ярим йил ичида биринчиси бўлди. Журналистлар тахминига кўра, йиғилиш кундузи ўтказилган, аммо бу ҳақда кечгача хабар бермай туришган. Шу тариқа, Путиннинг баёнотлари АҚШда иш куни охирида, Россия воситачилигига умид қилаётган Вашингтон учун қулай вақтда чиққан.