Павел Дуров Парижда яна сўроқ қилинди

Telegram мессенжери асосчиси Павел Дуров Франция пойтахти Парижда 2024 йилда бошланган жиноий иш доирасида яна бир бор сўроқ қилинди. Франция нашрларининг хабар беришича, бу унга айблов эълон қилинганидан бери ўтказилган тўртинчи сўроқ бўлиб, у олти соатдан зиёд давом этган.

Фото: AFP

Le Figaro газетаси манбаларига таяниб хабар беришича, Франция ҳуқуқни муҳофаза қилувчи органлари Telegram платформаси орқали содир этилиши мумкин бўлган жиноятларга нисбатан мессенжер раҳбариятининг эҳтимолий жавобгарлиги юзасидан терговни давом эттирмоқда.

Сўроқ якунланганидан сўнг Павел Дуровнинг уч нафар адвокати AFP агентлигига баёнот бериб, деярли икки йил давом этаётган тергов давомида уларнинг мижозига қўйилган айбловларни тасдиқловчи аниқ далиллар тақдим этилмаганини билдирди.

Ҳимоячиларнинг таъкидлашича, улар Франция суд органлари ҳамда Европа суд инстанцияларига тегишли шикоятлар киритган.

Дуровга қўйилган айбловлар

Павел Дуров 2024 йил 24 август куни Париж аэропортида қўлга олинган эди. Франция терговчилари уни Telegram платформасида контентни етарлича назорат қилмаганлик ва ҳуқуқни муҳофаза қилувчи органлар билан ҳамкорлик қилишдан бош тортганликда айбламоқда.

Тергов фикрича, мессенжерда назоратнинг етарли эмаслиги болалар порнографияси тарқатилиши, гиёҳвандлик воситалари савдоси, фирибгарлик ҳамда бошқа жиноятларга қарши курашни қийинлаштирган.

Сафарга қўйилган чекловлар бекор қилинган

2025 йил ноябр ойида AFP агентлиги Франция ҳукумати Дуровнинг мамлакатдан чиқишига қўйилган чекловларни бекор қилганини хабар қилган эди. Илгари унга фақат ўзи истиқомат қиладиган Дубайга чекланган сафарларга рухсат берилган бўлса, кейинчалик эркин сафар қилиш ва полиция бўлимида мунтазам рўйхатдан ўтиш мажбурияти ҳам бекор қилинган.

Бироқ Париж прокуратураси 2026 йил май ойида мазкур жиноят иши ҳали ёпилмаганини ва тергов ҳаракатлари давом этаётганини маълум қилди.

Россияда ҳам босим кучайган

Шу билан бирга, Telegram Россияда ҳам қатор чекловларга дуч келмоқда. Мамлакат ҳукумати 2026 йил февраль ойидан бошлаб мессенжер фаолиятини секинлаштирган. 2025 йил августидан эса WhatsApp ва Telegram орқали қўнғироқ қилиш хизмати блокланган.

Россия расмийлари бу қарорларни фирибгарлик ҳолатларига қарши кураш билан изоҳлаган бўлса, Павел Дуров 2026 йил феврал ойида Россияда унга нисбатан терроризмга кўмаклашиш моддаси бўйича жиноят иши қўзғатилганини маълум қилган.

Россия Telegramʼни аввал ҳам 2018–2020 йиллар давомида блоклаган эди. Ўшанда компания ФХХ талабига кўра фойдаланувчилар ёзишмаларини шифрдан чиқариш калитларини тақдим этишдан бош тортгани сабаб қилиб кўрсатилган эди.