Путин урушни давом эттирмоқчи

РФ президенти Владимир Путин Украина билан тинчлик музокаралари бўйича таклифларни рад этмоқда ва катта эҳтимол билан эскалация йўлини тутади. Бу ҳақда Reuters Кремлга яқин бўлган учта манбага таяниб хабар берди.

Агентлик маълумотига кўра, Украинанинг Россия нефтни қайта ишлаш заводлари бўйлаб зарбалари кучайиши Путиннинг ҳарбий ҳаракатларни давом эттиришга бўлган қатъиятини янада мустаҳкамлаган. РФ президенти билан тез-тез учрашиб турадиган манба яқин ойларда эскалация юзага келиши «эҳтимоли юқори»лигини айтган. У бу қандай кўринишда бўлишига аниқлик киритмади.

Манбалардан бири Россия президенти Донецк областининг қолган қисмини босиб олиш масаласида «муросасиз позицияни эгаллагани»ни, яқинда фронтнинг ҳозирги чизиғида ўт очишни тўхтатиш асосида муроса йўлини излашни таклиф этган маслаҳатчилар гуруҳини танқид қилган. Reuters нашрининг бошқа суҳбатдоши қайд этишича, россиялик ҳарбийлар тез орада Донбассни эгаллаб олишига Путиннинг «ишончи комил».

Россия президенти матбуот котиби Дмитрий Песков Reuters сўровига жавобан шундай деган: «Россия можарони тинч йўл билан ҳал қилишга тайёр, аммо мустақил ҳаракат қилиш ва махсус ҳарбий амалиётни давом эттириш учун етарли салоҳиятга эга».

Яқинда Путин очиқчасига Украинанинг Россия нефтни қайта ишлаш заводларига берган зарбалари туфайли мамлакатда бензин тақчиллиги (бу мамлакат фуқароларининг учдан бир қисмига бевосита таъсир кўрсатди) унинг уруш олиб бориш режаларига таъсир қилмаслиги ҳақида гапирганди. Россия президенти Киев «ҳар икки томон ичкари ҳудудларга зарба беришни тўхтатиш» бўйича таклиф бергани, аммо бу таклифни рад этганини айтган. «Ахир Россиянинг узоқ масофали зарбалари анча кучли, сезгир ва тўғрисини айтганда, вайронкор», – деган у.

8 июл куни Путин Украина ўз ҳужумлари билан «жамиятда асабий вазият» яратишга уринаётганини айтди ва бунга эриша олмаслигига ишонч билдирди: «Россия энергия тизимининг мустаҳкамлик захираси жуда юқори – дунёдаги энг юқориларидан бири».