Инфантино яна ЖЧ иштирокчилари сонини ошириш ғояси ҳақида гапирди

ФИФА президенти Жанни Инфантино келгусида жаҳон чемпионати иштирокчилари сони 64 тагача кенгайтирилиши мумкинлигини истисно қилмаяпти. У бу ҳақда АҚШ, Мексика ва Канада яшил майдонларида илк бор 48 жамоа иштирокида ўтказилаётган турнир фонида маълум қилди.

Барча учун имкон

56 ёшли функционер келгусидаги режалар ҳақидаги саволларга жавоб бериш асносида бундай ғояни ҳам «кўриб чиқиш зарурлиги»ни айтган.

«48 та жамоа иштирокидаги турнир ҳақиқатан ҳам муваффақиятли ўтди. Ҳар бир жамоа юқори савияда ўйин намойиш этди. Барча қитъалардан келган жамоалар гол уришди ва камида битта очкога эга бўлишди. Африканинг 10 та жамоасидан тўққизтаси плей-оффга чиқди. Сўнгги жаҳон чемпионатида Африканинг атиги бешта вакили бор эди... Бу барча жамоаларни жалб қилиш – уларга иштирок этиш имкониятини бериш қанчалик муҳимлигини яна бир бор тасдиқлайди.

Бу, албатта, жаҳон чемпионатидан кейин кўриб чиқиладиган масала. Турнирни ташкиллаштиришда уни нафақат Европа ва Жанубий Америка, балки бутун дунё учун очиқ қилиш муҳимдир. Ҳар бир мамлакат жаҳон чемпионатида иштирок этишни орзу қилиш имкониятига эга бўлиши керак», – дея Инфантино сўзларини келтиради Blue Sport.

Жаҳон чемпионати иштирокчилари сонини 64 тагача кенгайтириш ҳақидаги муҳокамалар 2025 йилдаёқ бошланганди. Ўшанда турли даражадаги футбол функционерлари, жумладан, КОНМЕБОЛ раҳбари Алехандро Домингес ўз конфедерациясининг апрел ойидаги конгрессида шундай ғоя билан чиққанди. У янги форматни ФИФА турнирнинг 100 йиллигини нишонлайдиган 2030 йилги мундиалда синаб кўришни таклиф этганди. Инфантино ўшанда ушбу ҳамкасбини қўллаб-қувватлаганди.

«Ҳар бир ғоя – яхши ғоя. Биз юз йилликни қандай нишонлаш ҳақида ўйлашимиз лозим», – деганди швейцариялик мулозим ESPN нашрига.

Ишончдан қолиш

Инфантино анчада вақтдан буён турнирни кенгайтиришни орзу қилади, аммо у бошланган ишни охиригача етказа олиши даргумон. Фоларин Балогун билан боғлиқ можародан кейин президентнинг ФИФА ичидаги позицияси сезиларли даажада заифлашган.

Эслатиб ўтамиз, АҚШ миллий жамоаси форварди ЖЧ 1/16 финалида Босния ва Ҳерцеговинага қарши ўйинда (2:0) қизил карточка олганди, аммо унинг дисквалификацияси кечиктирилди ва кейинги босқичда Белгияга қарши ўйинда майдонга тушди. Кейинроқ маълум бўлишича, Балогуннинг жазосини шартлига алмаштиришни Инфантинодан Америка президенти Доналд Трамп илтимос қилган.

Ушбу янгилик турли футбол ассоциациялари ва футбол нашрлари томонидан кескин танқид қилинди. The Times нашри хабарига кўра, Инфантино ташкилот ичкарисида ҳам, ўзи ҳамкорлик қиладиган мамлакатларда ҳам ишончни йўқотган.

«Футболга Трампникидан кўра каттароқ сиёсий аралашув бўлмайди, ФИФАнинг тушунтириш беришга уринишлари эса бемаъни чиқди», – деган юқори мартабали манбалардан бири ушбу нашрга.

Жанни Инфантинонинг ўзи қандайдир қоидабузарликка йўл қўйганини тан олмаяпти, аммо унинг обрўсига жиддий путур етди. Нашр маълумотига кўра, у 2027 йилги сайловга ҳам ўз номзодини қўйишни режалаштирмоқда. Аммо, катта эҳтимол билан, у бу сафар жиддий рақобатга дуч келади – аллақачон унга муқобил номзод тайёрлаш имконияти муҳокама қилинмоқда.

Иштирокчилар сони кенгайтирилмаган тақдирда ҳам, 2030 йилги жаҳон чемпионати тарихдаги энг кенг кўламлиси бўлиши тайин: турнирни бир вақтда учта қитъадаги 6 мамлакат қабул қилади – Жанубий Америка (Уругвай, Аргентина, Парагвай), Европа (Испания, Португалия) ва Африке (Марокаш). Иштирокчилар сони янада кўпайиши турнирни мисли кўрилмаган даражага олиб чиқади, аммо унинг амалга ошиши факт эмас.