Tesla акциядорлари Илон Маскка бир триллион долларлик бонус беришга рози бўлди

Tesla акциядорлари Илон Маскка компания раҳбари лавозимидаги фаолияти учун рекорд миқдордаги компенсация пакетини тасдиқлади. Reuters агентлиги хабар беришича, компания акциядорларининг Техас штати Остин шаҳрида ўтказилган йиғилишида бундай таклиф акционерларнинг 75 фоиз қисми томонидан маъқулланган.

Сентябр ойи бошида директорлар кенгаши Маскка муайян мақсадларга эришиш шарти билан бир триллион долларлик «мукофот пакети»ни таклиф қилмоқчи экани маълум бўлганди.

Ушбу келишув сайёранинг энг бой одами бўлган Маскка яқин йиллар ичида компаниянинг бозор қийматини сезиларли даражада ошириш ва бошқа кўрсаткичларга эришиш мажбуриятини юклайди. Агар у буни амалга оширса, у Tesla’​​нинг юз миллионлаб янги акциялари билан тақдирланади.

Бундай тўлов Маскни тарихдаги биринчи триллионерга айлантириши мумкин. Октябр ойи бошида у Forbes томонидан бойлиги 500 миллиард долларга баҳоланган илк одамга айланганди.

Ҳозирда Tesla’​​нинг бозор баҳоси 1,4 трлн доллар атрофида – Маск эса бу миқдорни яқин ўн йил ичида 8,5 трлн долларга етказиши керак. Шунингдек, у бир миллионта Tesla Robotaxi ҳайдовчисиз автомобилларни тижорий фойдаланувга топшириши керак бўлади.

«Биз қилмоқчи бўлаётган нарса – бу шунчаки Tesla келажагидаги янги саҳифа эмас, балки мутлақо янги китоб бўлади, – деган Маск Остинда йиғилганлар қаршисида. — Акциядорларнинг бошқа йиғилишлари – шунчаки зерикарли маросим, бизники эса – портлашдек. Бу ажойиб».

Маъқулланган пакет Маск Tesla’да яна камида 7,5 йил қолишини назарда тутади. Бу эса унга компаниядаги улушини 12 фоиздан 25 фоиздан кўпроққа ошириш имконини беради.

Маск аввалроқ Tesla’нинг ўсиш салоҳиятини чексиз деб таърифлаб, агар у автоном ҳайдаш ва сунъий интеллект технологиялари бўйича режаларини амалга оширса, дунёдаги энг қиммат компанияга айланишини айтганди.

Маск, агар унинг улуши у компаниянинг келажагини белгилаши мумкин бўлган даражада кўпайтирилмаса, Tesla’дан кетиши ёки иккинчи планга ўтиши мумкинлигига шама қилганди.

Tesla директорлар кенгаши раҳбари Робин Денҳолм акциядорларни таклифни қўллаб-қувватлашга чақираркан, Маскнинг компанияда қолиши компания келажаги учун ҳал қилувчи аҳамиятга эга эканини айтди ва агар у кетса, Tesla акциялари қулаши мумкинлигидан огоҳлантирди.

Tesla директорлар кенгаши, шунингдек, миллиардернинг баҳсли сиёсий арбобларни қўллаб-қувватлаши савдога салбий таъсир кўрсатиши ҳақидаги танқидий фикрларни рад этди, дея таъкидлайди AFP.

Янги мукофот пакети Tesla’нинг йирик инвесторлари, жумладан, Норвегия давлат пенсия жамғармаси (дунёдаги энг йирик миллий фаровонлик жамғармаси), шунингдек, АҚШнинг энг йирик давлат пенсия жамғармаси CalPERS томонидан рад этилди, улар илгари ҳам Маскка катта бонуслар тўлашга қарши чиққанди.