Ўзбекистонда АЭС қурилиши старти 2026 йил охирига қолдирилади

Жорий йилдаги давлат дастури лойиҳасида Ўзбекистонда атом электр станцияси қурилиши 2026 йил декабр ойида бошланиши (биринчи бетонни қуйиш) кўзда тутиляпти. «Ўзатом»нинг расмий тушунтиришига кўра, кўрсатилган сана тайёргарлик ва лицензиялашнинг барча кўп сонли мажбурий босқичлари айнан шу муддатгача якунланишини назарда тутувчи консерватив сценарийни акс эттиради.

Фото: Ўзатом

Ўзбекистонда атом электр станцияси қурилишини бошлаш 2026 йил декабрига қолдирилди. Бу ҳақда давлат дастури лойиҳасида келтириб ўтилган.

Қайд этилишича, 2026 йил давомида «Росатом» билан қўшимча келишув ишлаб чиқиш, имзолаш ва рўйхатдан ўтказиш режалаштирилган. Ушбу ҳужжат интеграциялашган АЭС лойиҳасининг янги конфигурациясини, яъни катта қувватли VVER-1000 реактори ва кичик қувватли RITM-200Н реакторларини қамраб олади.

Ҳолат юзасидан «Ўзатом» расмий тушунтириш берди ва аввал эълон қилинган муддатлар амалда қолишини ва ҳужжатда уларни кечиктириш ҳақида ҳеч қандай маълумот кўзда тутилмаганини билдирди.

«Лойиҳада кўрсатилган сана тайёргарлик ва лицензиялашнинг барча кўп сонли мажбурий босқичлари айнан шу муддатгача якунланишини назарда тутувчи консерватив сценарийни акс эттиради. «Ўзатом» агентлиги миллий қонунчилик талаблари ҳамда ядровий ва радиациявий хавфсизлик бўйича халқаро стандартларга қатъий риоя қилган ҳолда барча белгиланган тартиб-таомиллардан изчил ва пухта ўтмоқда. Биринчи бетон қуйиш лойиҳасини амалга ошириш муҳим воқеа бўлиб, у кенг ёритиб борилади. Шу билан бирга, биз ушбу фаолият қай даражада жавобгарлик талаб қилишини англаб етамиз ва ушбу босқичга фақат ваколатли органлардан зарур рухсатномалар ва розиликларнинг тўлиқ тўпламини олганимиздан кейингина киришамиз», дейилади агентлик изоҳида.

АЭС қуриш лойиҳаси

2025 йилнинг октябр ойида Марказий Осиё – Россия саммити доирасида, Фориш туманида кам қувватли атом электр станцияси реакторининг биноси учун котлован қазиш ишларига старт берилди. Биринчи бетонни қуйиш 2026 йил март ойига режа қилинганди. Шунингдек, ўтган йилда катта АЭС масаласи яна сиёсий кун тартибига қайтди ва бу борада Москвада бир нечта ҳужжатлар имзоланди. 26 сентябр кунги битимга асосан, Жиззахдаги танланган майдонда ҳам кам қувватли, ҳам анъанавий йирик АЭС қуриладиган бўлди. Агар лойиҳа амалга ошса, Ўзбекистон катта ва кичик атом станцияларини битта майдонда интеграция қилган дунёдаги биринчи давлатга айланади.