“Биз Яқин Шарқдаги урушлардан чарчадик” — америкалик сенатор

2-3 март кунлари АҚШ Конгрессидаги ёпиқ сессияларда Америка ва Исроил томонидан Яқин Шарқда бошланган янги уруш юзасидан ҳукумат вакиллари сўроқ-савол қилинди.

Президент Трамп Эронга ҳужум қилишдан олдин Конгресс розилигини олмаган эди.

Конгрессдаги эшитувларда давлат котиби Марко Рубио, Марказий разведка бошлиғи Жон Рэтклифф ва мудофаа вазири Пит Ҳегсет иштирок этди.

“Бу – заруриятсиз бошланган уруш”

Сенатдаги демократлар етакчиси Чак Шумер ёпиқ эшитувлардан кейинги баёнотида ҳукумат аъзоларининг жавобларидан умуман қониқмаганини айтди:

“Кўплаб саволлар берилди, мен уларнинг жавобларини мутлақо қониқарсиз деб ҳисоблайман. Шахсан менда бу брифинг жавоб олганимдан кўра кўпроқ янги саволларни уйғотди.

Бу – Трампнинг уруши. Бу – заруриятсиз бошланган уруш. Трампнинг стратегияси йўқ, у урушни қандай тугатишни билмайди”.

Шумернинг сўзларига кўра, АҚШ аҳолиси ҳукуматдан урушни эмас, нарх-навони пасайтирадиган чораларни кутаётган эди:

“Бу – Америка халқи хоҳлаган нарса эмас. Америка халқи уларни эзаётган нарх-наво ошишига қарши самарали ҳаракатларни истаяпти”.

“Бу – зарурият эмас, танлов асосида бошланган уруш. Демократлар ҳам, республикачилар ҳам, умуман сиёсатга қизиқмайдиганлар ҳам – деярли ҳамма бир фикрда якдил: биз Яқин Шарқдаги ниҳоясиз урушлардан зада бўлиб, чарчадик”, – деди демократлар етакчиси.

“Исроилнинг мақсадлари учун америкалик ҳарбийлар қурбон бўляпти”

АҚШ Сенатининг разведка қўмитаси аъзоси, демократ Марк Уорнер бу урушни бошлашдан АҚШ эмас, Исроил манфаатдор бўлганини айтди.

“Очиқ-ойдин таъкидлашимиз керакки, эронликлардан Америка Қўшма Штатларига бевосита таҳдид мавжуд эмас эди. Исроилга таҳдид бор эди. Агар биз Исроилга таҳдидни Қўшма Штатларга тўғридан тўғри таҳдидга тенглаштирсак, унда биз харитада йўқ ҳудудга тушиб қоламиз.

Бу амалиётдан кўзланган мақсад 5-6 марта ўзгарганини кўриб турибмиз. Бир ҳафта олдин Эроннинг ядровий салоҳиятини йўқ қилиш ҳақида гапирилаётган эди. Бир неча кун олдин эса баллистик ракеталарини йўқ қилиш мақсадини айтишди. Кейин эса президентнинг ўзи “мақсадимиз режимни ўзгартириш” деди. Энди эса биз “Эрон флотини чўктириш” ҳақидаги гапларни эшитяпмиз.

Мен шундай савол бердим: “АҚШ президенти Эрон халқига: “Кўтарилинг, бу мамлакатингизни қайтариб олиш учун имконият” деб айтди, лекин юз минг эронлик Теҳрон кўчаларига чиқса ва Ислом инқилоби қўриқчилари корпусининг шафқатсиз кучлари улардан 5 минг, 10 минг, 20 мингтасини ўлдирса, нима бўлади?

Бу – заруриятсиз бошланган уруш бўлди. Бошқалар ҳам эътироф этганидек, бу урушнинг бошланишида Исроилнинг мақсадлари ва хронологик ҳаракатлари устуворлик қилди. Исроил – АҚШнинг буюк иттифоқчиси, мен Исроилни қатъий қўллаб-қувватлайман, лекин якунда ишончим комилки, биз америкалик ҳарбийлар ҳаётини хавфга қўяётган эканмиз, америкаликлар орасида қурбонларни кўриб турган эканмиз ва уларнинг сони ошиши аниқ бўлиб турган экан, бевосита Американинг манфаатларига таҳдид бўлганини исботловчи далиллар бўлиши шарт эди”, – деди Уорнер.

Маълумот учун, 28 февралдан бошланган Яқин Шарқдаги янги урушда аллақачон 6 нафар америкалик ҳарбий ҳалок бўлиб улгурди.