NATO Sulaymoniyning o‘limidan keyin Iroqda harbiylarni o‘qitishni to‘xtatdi

NATO Eron generali Qosim Sulaymoniyning o‘limidan keyin Iroqdagi kuch ishlatish tuzilmalari vakillarini o‘qitishni to‘xtatdi. Bu haqda alyans vakili vazifasini bajaruvchi Dilan Uayt ma'lum qildi.

"NATO missiyasi davom etadi, ammo mashg‘ulotlar olib borish hozircha to‘xtatildi", - deya Uaytning so‘zlaridan iqtibos keltirmoqda Frans Press agentligi.

NATO vakilining bildirishicha, alyans bosh kotibi Yyens Stoltenberg, "so‘nggi voqealardan kelib chiqib" AQSh mudofaa vaziri Mark Esper bilan telefon orqali muloqot qilgan.

NATOning Iroqdagi missiyasi Bag‘dodning iltimosiga binoan mamlakat kuch ishlatish tuzilmalari vakillarining tayyorgarligi bilan shug‘ullanadi.

3 yanvarga o‘tar kechasi Bag‘dod aeroporti hududida AQSh aviazarbalari oqibatida Islom inqilobi muhofizlari korpusi (IIMK) tarkibidagi «Al-Quds» maxsus bo‘linmasi qo‘mondoni general Qosim Sulaymoniy halok bo‘ldi.

Eron oliy yetakchisi Oyatulloh Ali Xominaiy Iroqda general Qosim Sulaymoniy o‘ldirilgani sababli mamlakatda 3 kunlik milliy motam e'lon qildi va AQShdan buning uchun qasos olinajagini ma'lum qildi.