Turkiya zudlik bilan Xitoyning koronavirusga qarshi vaksinasini sotib oladi

Turkiya hukumati Xitoyda ishlab chiqarilgan koronavirusga qarshi vaksinani zudlik bilan sotib olish to‘g‘risida qaror qabul qildi. Bu haqda Turkiya tashqi ishlar vaziri Mavlut Chovusho‘g‘lu Xitoy tashqi ishlar vaziri Van I bilan telefon orqali muloqotida ma'lum qildi, deb xabar bermoqda Sinxua agentligi.

"Chovusho‘g‘lu Turkiya tomoni Xitoy vaksinasini xavfsiz va samarali deb hisoblashini aytdi hamda Xitoydan zudlik bilan vaksina sotib olishini ma'lum qildi", – deyiladi xabarda.

Xitoyda koronavirusga qarshi vaksina ishlab chiqish bilan Sinovac Biotech Ltd kompaniyasi shug‘ullanmoqda. Vaksina Braziliya, Indoneziya va Turkiyada uchinchi bosqich klinik sinovlardan o‘tkazilmoqda.

Avvalroq Xitoy dunyo bo‘ylab millionlab dozada vaksina yetkazib berishni va'da qilgandi. 

Eslatib o‘tamiz, dekabrda O‘zbekistonda ham Xitoy Fanlar akademiyasi Mikrobiologiya institutining ishlanmasi asosida Zhifei Longcom Biopharmaceutical Co., Ltd kompaniyasi ishlab chiqqan koronavirusga qarshi vaksinaning uchinchi bosqich klinik sinovlarini o‘tkazish ishlari boshlandi.