Туркия зудлик билан Хитойнинг коронавирусга қарши вакцинасини сотиб олади

Хитойда коронавирусга қарши вакцина ишлаб чиқиш билан Sinovac Biotech Ltd компанияси шуғулланмоқда. Вакцина Бразилия, Индонезия ва Туркияда учинчи босқич клиник синовлардан ўтказилмоқда.

Фото: Kevin Frayer / Getty Images

Туркия ҳукумати Хитойда ишлаб чиқарилган коронавирусга қарши вакцинани зудлик билан сотиб олиш тўғрисида қарор қабул қилди. Бу ҳақда Туркия ташқи ишлар вазири Мавлут Човушўғлу Хитой ташқи ишлар вазири Ван И билан телефон орқали мулоқотида маълум қилди, деб хабар бермоқда Синьхуа агентлиги.

"Човушўғлу Туркия томони Хитой вакцинасини хавфсиз ва самарали деб ҳисоблашини айтди ҳамда Хитойдан зудлик билан вакцина сотиб олишини маълум қилди", – дейилади хабарда.

Аввалроқ Хитой дунё бўйлаб миллионлаб дозада вакцина етказиб беришни ваъда қилганди.

Эслатиб ўтамиз, декабрда Ўзбекистонда ҳам Хитой Фанлар академияси Микробиология институтининг ишланмаси асосида Zhifei Longcom Biopharmaceutical Co., Ltd компанияси ишлаб чиққан коронавирусга қарши вакцинанинг учинчи босқич клиник синовларини ўтказиш ишлари бошланди.

Тайёрлаган Дилшод Аскаров

#вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.