YeI 30 yil ichida birinchi marta Xitoyga nisbatan sanksiyalar kiritmoqda

YeI kengashi inson huquqlari muntazam buzilishi sababli tashqi ishlar vazirlari darajasida Xitoyga nisbatan sanksiyalar kiritishga kelishib oldi.

Qayd etilishicha, bu 30 yildan ortiq vaqt davomidagi birinchi sanksiyalar paketi hisoblanadi.

Bungacha YeI 1989 yilda Pekindagi Tyananmen maydonidagi namoyishlar ayovsiz bostirilganidan so‘ng Xitoyga qurol yetkazib berishga embargo kiritgandi.

Sanksiyalar ro‘yxatiga to‘rt nafar jismoniy va bitta yuridik shaxs kiritildi. Ularning YeIdagi aktivlari muzlatiladi, Yevroittifoqqa kirishlari taqiqlanadi.

Bryussel ushbu sanksiyalarni uyg‘urlarning genotsid qilinishi bilan bog‘lamoqda.

O‘z navbatida, Xitoy tashqi ishlar vazirligi Bryusselga qarshi "keskin" javob choralari qo‘llanilishini ma'lum qilgan.