YeI isroillik ko‘chmanchilarga qarshi yangi sanksiyalarni kelishib oldi

U X ijtimoiy tarmog‘idagi sahifasida YeI tashqi ishlar vazirlari “falastinliklarga qarshi zo‘ravonliklar munosabati bilan isroillik ko‘chmanchilarga qarshi sanksiyalarni ma’qullaganini” yozgan.

Kallasning qo‘shimcha qilishicha, Yevropa Ittifoqi shuningdek, HAMAS harakati yetakchilariga qarshi ham yangi sanksiyalarni kelishib olgan. Biroq u aniq shaxslar nomini ochiqlamagan.

11 may kuni Fransiya tashqi ishlar vaziri Jan-Noel Barro ham ijtimoiy tarmoqlarda Yevropa Ittifoqi G‘arbiy sohildagi “ekstremistik va zo‘ravon kolonizatsiyani qo‘llab-quvvatlayotgan asosiy isroillik tashkilotlar hamda ularning rahbarlariga qarshi sanksiyalar kiritayotgani”ni bildirgan.

Uning ta’kidlashicha, “bunday o‘ta jiddiy harakatlar zudlik bilan to‘xtatilishi kerak”.

Barro HAMASni “terrorchilik harakati” deb atab, uni to‘liq qurolsizlantirish va Falastin hududlari kelajagini belgilash jarayonidan chetlashtirish lozimligini aytgan.

YeIning yangi sanksiyalarni kelishib olishiga Vengriyaning pozitsiyasini o‘zgartirishi sabab bo‘lgan. Avvalroq Budapesht ushbu choralarni bir necha oy davomida bloklab kelayotgan edi.

Jahon agentliklari ma’lumotiga ko‘ra, yangi sanksiyalar uch nafar isroillik ko‘chmanchi va to‘rtta ko‘chmanchilar tashkilotiga nisbatan qo‘llanadi. Ammo ularning nomlari hozircha oshkor etilmagan.

2024 yilda Yevropa Ittifoqi G‘arbiy sohilda falastinliklarga qarshi zo‘ravonliklarda ayblangan to‘rt nafar shaxs va ikki kompaniyaga nisbatan sanksiyalar joriy qilgan edi. Ushbu choralar viza cheklovlari va aktivlarni muzlatishni nazarda tutgan.

11 may kuni qabul qilingan qaror sanksiyalarni rasman joriy etish bo‘yicha huquqiy jarayonni boshlab bergan. Cheklov choralari keyinroq kuchga kirishi kutilmoqda.

Isroil bosh vaziri Binyamin Netanyahu Yevropa Ittifoqining bu qarorini qattiq tanqid qilib, uni “ma’naviy bankrotlik” deb atagan.

Uning fikricha, Yevropa Ittifoqi “isroillik fuqarolar va HAMAS terroristlari o‘rtasida soxta tenglik yaratgan”.

Avvalroq Isroil tashqi ishlar vaziri Gideon Saar ham YeI sanksiyalarini “o‘zboshimchalik” deb baholagan.

Ma’lumot uchun, Isroil 1967 yilgi Olti kunlik urushdan so‘ng Iordan daryosining G‘arbiy sohili ustidan nazorat o‘rnatgan. Xalqaro huquqqa ko‘ra, ushbu hududlarda yahudiy posyolkalarini qurish noqonuniy hisoblanadi.

2024 yil 19 iyul kuni BMT Xalqaro sudi mazkur posyolkalar xalqaro huquqni buzishini tan olgan.

Hozirgi vaqtda G‘arbiy sohilda taxminan 500 ming yahudiy va 3 millionga yaqin falastinlik yashaydi.

Yaqin Sharqdagi vaziyat 2023 yil 7 oktyabrda HAMASning Isroilga yirik hujum uyushtirishi ortidan keskinlashgan edi. O‘shanda qariyb 1200 kishi halok bo‘lgan, 250 ga yaqin odam garovga olib ketilgan.

2025 yil oktyabrida Isroil va HAMAS AQSh prezidenti Donald Tramp ma’muriyati ishlab chiqqan tinchlik rejasi doirasida o‘t ochishni to‘xtatishga rozi bo‘lgan.

2026 yil yanvar oyida Oq uy G‘azo sektoridagi urushni tugatish rejasining ikkinchi bosqichi boshlanganini ma’lum qilgan.

https://www.dw.com/ru/es-soglasoval-nove-sankcii-protiv-izrailskih-poselencev-na-zapadnom-beregu/a-77126103