Chexiyada yuk poyezdlari to‘qnashuvi sodir bo‘ldi

Chexiyaning Teplitse shahri yaqinida ikkita yuk poyezdi to‘qnashib ketdi. Bu haqda Ceske Noviny nashri xabar berdi.

Xabarda aytilishicha, poyezdlardan birining mashinisti halok bo‘lgan, ikkinchi poyezd mashinisti jarohatlangan.

 Mamlakat temir yo‘l ma'muriyati vakili Dushan Gavendaning so‘zlariga ko‘ra,propan-butan tashiyotgan uchta vagon va ko‘mir tashuvchi bir vagon relslardan chiqib ketgan. To‘qnashuv natijasida lokomotivlardan biri yona boshlagan.

Dastlabki taxminga ko‘ra, to‘qnashuv mashinistlardan birining signal oldida to‘xtamagani sababli yuz bergan.