Ulug‘bek Uzoqov Qashqadaryo viloyatiga ishga o‘tdi

Qashqadaryo viloyati hokimining qishloq va suv xo‘jaligi masalalari bo‘yicha o‘rinbosari Obloyor Boymirov lavozimidan ozod etildi. Qashqadaryo viloyati hokimligi matbuot xizmati xabar berishicha, Ulug‘bek Uzoqov viloyat hokimining qishloq va suv xo‘jaligi masalalari bo‘yicha birinchi o‘rinbosari lavozimiga tayinlangan.

Muqaddam Qashqadaryo viloyati qishloq xo‘jaligi boshqarmasi boshlig‘ining birinchi o‘rinbosari bo‘lgan Obloyor Boymirov 2019 yil kuzida, viloyatga Zoyir Mirzayev rahbar bo‘lganida uning qishloq va suv xo‘jaligi masalalari bo‘yicha o‘rinbosari vazifasini bajaruvchi etib tayinlangandi.

Ulug‘bek Uzoqov 1969 yil Toshkent viloyatida tug‘ilgan. Toshkent davlat agrar universitetini tamomlagan. 

Ko‘p yillar davomida Vazirlar Mahkamasi qishloq va suv xo‘jaligi, qishloq xo‘jaligi masalalari axborot-tahlil departamenti boshlig‘i bo‘lib ishlagan Uzoqov 2016 yilda Jizzax viloyatiga hokim bo‘lgan, 2017 yil kuzida paxta yig‘imi mavsumida qo‘shib yozishga yo‘l qo‘yishda ayblanib, viloyat hokimligidan olingan va viloyatning Do‘stlik tumani hokimligiga tushirilgandi.

U 2021 yil yanvarida, Toshkent viloyatiga Davron Hidoyatov rahbar bo‘lib kelganida unga o‘rinbosarlikka (Toshkent viloyati hokimining qishloq va suv xo‘jaligi masalalari bo‘yicha birinchi o‘rinbosari lavozimiga) o‘tkazilgandi.

• Ma'lumot uchun, ayni vaqtda Davron Hidoyatov viloyat hokimi lavozimidan olinishi kutilmoqda. Uning o‘rnini 2019 yildan buyon Qashqadaryo viloyatini boshqarib kelgan Zoyir Mirzayev egallaydi.
• Bungacha Qashqadaryo viloyatiga Davlat bojxona qo‘mitasi raisi Murodjon Azimov yangi hokim etib tayinlangandi.