Toshkentda pulli «parkovka»lar tashkil etiladigan ko‘chalar ro‘yxati e’lon qilindi

Prezident “Toshkent shahar jamoat transport tizimini yanada rivojlantirishga doir qo‘shimcha chora-tadbirlar to‘g‘risida”gi qarorni imzoladi.

«Toshkent shahri markaziy ko‘chalarida tirbandlikni, avtotransport oqimini kamaytirish, jamoat transporti harakatining o‘rtacha tezligini oshirish, avtomobillarning yo‘llar bo‘ylab tartibsiz to‘xtab turishini tartibga solish, aholining jamoat transportidan foydalanishini rag‘batlantirish maqsadida yo‘l chetida avtomashinalarning pulli to‘xtash joylari tizimi joriy etiladi», deyiladi hujjat matnida. 

2022 yilda 10 ta markaziy ko‘chalarda davlat-xususiy sheriklik asosida avtomobillarning avtomatlashtirilgan yo‘lbo‘yi pulli to‘xtash joylari tashkil etiladi. Ro‘yxatga Fidokor, Amir Temur, Nukus, Bratislava, Mirobod, Glinka, Avliyoota, T.Shevchenko, Said Baraka, Moshtabib, Yakub Kolas ko‘chalari kiritilgan.

Avtoturargohlarni yaratish bo‘yicha barcha ishlar yil oxirigacha yakunlanishi kerak. Vazirlar Mahkamasiga yo‘l chetidagi avtomatlashtirilgan pulli avtoturargohlarni tashkil etish va ulardan foydalanish tartibi to‘g‘risida qaror qabul qilish topshirildi. 

Toshkent shahrining magistral ko‘chalari - Keles yo‘li, Ahmad Donish, Bog‘ishamol, Buyuk ipak yo‘li, Maxtumquli, Farg‘ona yo‘li, Lutfiy, Beshqayrag‘och, Ko‘kcha darvoza va Beruniy ko‘chalaridagi 11 ta avtobus yo‘nalishida alohida yo‘laklar tashkil etiladi. Joriy yil Ahmad Donish ko‘chasida alohida yo‘lak ishga tushiriladi.